Lala Qhawe!
Imsebenzi yakho iyaziwa
Imsebenzi yakho ayidinge koniwa
Amakhaya amaningi ama ngawe
Uzondlile izicebi nezintandane
Lo mlando ungezwakala njengenganekwane
Lapho usenamandla ubuphila
Ukushintshile ukuphila kwelengabade
Ulandela izinyathelo zamaqhawe namaqhawekazi
Ozuka notiki nabo asebakhothama
Emandleni omnotho ubungantengantengi
Izinsizwa nezintombi ubuzinika amandla
Amandla nawe owamukeliswa oyise mkhulu
Bebephila njengawe sheleni
“Ngiphila njengosheleni” besisho njalo
Kodwa namuhla sililela wena
Ukudla bekungabizi kangaka ephaketheni
Izindleko zokuphila bezingambi eqolo
Manje sezimba khona kanye eqolo
Ngokuphangalala kwakho sheleni
Siyakubukela nje uphangalale ezitalatini
Besingakuyeki uma sikubona ezitalatini
Ubusixhopha siseza le ngobuhle bakho
Ubungusuka sambe wenziswa
Insizwa ebingaconsi phansi
Lingekho nesoka elingenasici
Igazi liye lachitheka ngenxa yakho
Bafa abantu eMnambiti ngenxa yakho
Bayaxabana abaqhashi nabasebenzi ngenxa yakho
Kanti nenkohlakalo ithè chithi saka ngenxa yakho
Yilowo ngalowo ugcwalisa elakhe isaka
Ngokuthatha ngozipho nje qha
Kuningi abakwenza egameni lakho
Awubagunyazanga futhi awubafundisanga
Ngoba le mfundiso ayiveli kwankece
Ngobubende ingabudlanga iyaye ibhecwe
Sheleni uke wakhonya njengenkunzi
Isithunzi sakho ngiyohlezi ngisibona
Ngifikelwa zinyembezi uma bekukhohlwa kanje
Isithunzi sakho besithela ngezintuli
Abazi yini isintunzi siyasetshenzelwa
Kaze ubani lo okubophele amanqina enyathi?
Kusobala itshe seligaya ngomunye umhlathi
Akekho obazi ukuthi usheleni uzoke aphangalale
Ngoba ububonakala usimeme
Oyothatha isikhundla sakho akaziveze
Maka kwenze kucace ukuthi uzimele
Nokuthi uyobamba elakhe iqhaza angeke acheme
Imisebenzi yakhe mayimvotele
Sheleni akekho oyofana nawe
Sheleni ubuwedwa ungafani namuntu
Futhi ubungacheme namuntu
Sheleni uyibekile induku ebandla
Soxoxela abazukulu bethu ngawe bathwale izandla ekhanda
Ewu lafa elikaMthaniya kaNdaba!
Lala uphumule Qhawe sheleni
Imsebenzi yakho siyibonile…!
Ibhalwe ngu :
Sthembiso Sydney Msezane