Kwamama ongemama kuyashisa,

Ningibona ngithi mama, ngiyibamb’ishisa,

Wayeqinisile umama, emendweni kuyashisa, 

Ukube bengazi bengiyothumel’igundwane,

Hho hhe! Umendo awuthunyelwa gundwane,

Nosokhaya ungihlanganyela nababuko,

Nasekhaya ngiyakhumbula uma sekunje,

Ngiyofika ngithini ekhaya ngoba ngakhishwa,

Nabasemzini mina bangikhipha inyumbazana,

Ubaba udayise ngami kubafokazana,

Emzini uzibambe ziqine malokazana,

Okwami okwezandla ngiyazisa,

Mina nomamezala sisesithenjini ngiyanazisa,

Kuxega iphinifa kusinda nesidwaba,

Umamezala ungibhulela isidwaba,

“Kukwami la” esho ezishaya isifuba,

Uma nginganivulel’isifuba ziyakhala,

Sengakhala ubusuku nemini yabo,

Izinkulumo zabo kimi ziyalumela,

Mangiphek’ezangaphakathi bathi ziyalumela,

Mina ekhaya ngiyafisa nokubuyela,

Umendo ungehlule mina sengiyanitshela,

Ziyayishuka imbodla mina ngiyanihlebela,

Amagwababa echobana mina ngizowaxoxela,

Nalendoda ngamanqindi mina isiyangibhakela,

Sengacubuza ngakhathala mina ngibabhakela,

Ngenkondlo kaNongalo mina ngiyazikhalela,

Nenkondlo yami yasesigcawini ngiyayiqalekisa,

Umamezala wam’empilweni yakhe ngiyisiqalekiso,

Uma ningazi mina ngibhekene nesikhubekiso,

Ukudla bathi mina ngiyakufihla,

Nosokhaya imali yakhe useyayifihla,

Kwamama ongemama kuyashisa,

Umamezala uthi ukudla mina ngiyakushisa,

Kushisa amabhodwe kushisa nomendo,

Ngavuma ngalethwala ijoka elishisayo,

Emendweni kuyabekezelwa kusho umama,

Umabuya emendweni mtanami angimfuni,

Ngiyoshonaphi ngoba lomamezal’akangifuni?