KUNGA BHODLA IBHOSA.
Itsomule zayo iinkutani.
Iinkutani ezingahlehli isinyeva.
Ngikhuluma ngeemphosi.
Iimphosi ezabonwa nguMaphosa.
Zona ezaphosa amakghono wazo
Ngaphetjheya kwamalwandle.
Ngikhuluma ngesalukazi sange Mthambothini.
Esaduma kwaduma iphasi loke.
Sitjho sininda ninda sakudlala ngepembe.
Sitjho ukuthi khamba siba labezimu bekhethu.
UGijimani ngeMrhononweni angagijima.
Azofakaza lendaba yeengwenya zeBhosa.
Zona azirithi zizakuratlaza phasi.
Zitlwebha kuvuthe inyama.
Ngitjho amasokana,
Ajabajaba ngekwipiri.
Alulubezwa nakurhaywa kwengoma.
Batjho! Bazibongelela.
“ Engagwaba nabo abajami nami estikisini,
Ngingumswa wakoNjengabo mina”.
Ungakghwathi engakghwathwako.
Ungakghodlhi umlilo engeze wawotha.
Ibhosa izaku gojela ikuginye.
ZangeBhosa zivele zaveleleka emtarini.
Umtloli: Themba Emanuel Mashobane