Maloba ke lorile
Lesego e le lekepekepe
Lerato le phophoma boka mamapo
Le myemyelo e hlakela dithong tša mmele
Go nkga muši wa lethabo gohle
Bošego ke lorile
Baratani bale ba go ratana
Ba be ba apere bošweu ba nyalana
Pele ga moruti ba apara palamonwana
Mekgolokwane e rutlomolla ntlokgethwa
E le legoa la lethabo la babogedi
Ke lorile
Ba nyalane ba phumolana dikeledi
Ba ikana gore le ge le ka fiša tšhiritšhiri
Ba ikana gore le ge matlakadibe a ka poka
Ba ka se leke ba šikinyega goba go sekama
Ba tshwela mare diatleng ba re re monwana le lenala