Kanti yena umma ongibelethako wenza ngani?

Ngombana akawazi umnyango wesikolo,

Kodwana ngezamarhwebo ngitjho nemali,

Angeze wambeka ngaphasi.

Nakukuhlela izinto khona, ungafunga uthi uneziqu ezipheleleko zefundo ephakamileko.

Kanti mma wenza ngani?

Ngombana wena usikhulisile uwedwa,

Wenza izinto ezibhalela imizi enababelethi abajamileko ababili,

Kodwana wena utjhelelile, wathumba begodu waphumelela ngamalengiso.

Kanti wenza ngani silukazi sami?

Bayenza babuthene, babanengi,

Ngombana kuthiwa ukubumbana kwenza izinto zibelula, begodu kulula bonyana uphumelele.

Kodwana wena uwedwa,

Wenza ukudlula bona.

Begodu nabo bazibuze ukuthi ‘kanti wenza ngani?’

Abanye bazibuze bonyana kghani uthwele na?

Abanye babuze godu bona ungubani kanti yena?

Abanye godu ngokurareka, babuze ukuthi uyingilozi na?

Nangembala babuza babuzile abantu.

Kodwana uhlezi umbuzo omkhulu wokuthi, Kanti Mma wenza ngani?

Uhlula ngitjho nemimmoya evunguzako.

Uhlula ngitjho namadoda azitjho bonyana madoda, baqinile.

Ngithi uyafana nomuntu oneziqu begodu weqela ngale kweziqu.

Nakungimi ngithi thatha nanzo iziqu zobudorhodere,

Ngombana zikufanele.

Nangembala usirara sirarekile.

Umbuzo usajamile ‘Kanti ndlovukazi wenza ngani?’