Nanjengoko besiceliwe likhaya liphela
Singathengwanga ngazinkobe nanyama
Noxa nje iselwa lamasi ukuthoba unxano
Idombolo eqhiyeni okosana lisongelwe
Kunye necuba neyeza labadala enxilini
Le ndlela siyihambe sigunyaziswa ligazi.
Kaloku ikhwelo linyala mawethu, sisabele
Siphumile sawela imilambo nemiwewe
Amaxethuka namahla ndenyuka singooDabawo
Oodade kuyise yalenkwenkwe ityholwayo
Loxa yona imayamayaza okwenj’ uMaqandeni.
Ngelingeni sifikile emzini, nkqo! Molweni
Sahlangabezwa bubuso namazwi aqhelekileyo
Intsobi kwiintshiya zabo izolile ngomoya ophantsi
Sajongana sinqwala ngeentliziyo sifikile ncakasana
Apho besibhalelwe khona incwadi yokubika ityala.
Iincwadi kudala zabhalwa zibika ezintle nezimbi
Kodwa yona le iphuma kwelikhaya yayohlukile
Umoya wayo wawuzolile loxa uhleli emxholweni
Inovelwano nokuphathisana loxa iqinile kwinyaniso
Ingabeki zityholo logam’ isithi hlamban’ igama lenu.
Bobobubele ke esihlangabezwe ngabo emzini
Sathi singabahambeli ngekhwelo nezisolo
Suka yangathi singabahlobo abagqibelene mzuzu
Sithe sisabuka obobushushu yangena inzwakazi
Kanye yena usingaye ekha’ pha ingesosisu iyintaba.
Ufafa oluncothukileyo egadeni lujuzel’ emafini
Imbelukazi enonwele lushinyeneyo nolumnyama
Ngemeko yokuzithwala ithwelo iqhaga lempumlo
Isilebe sijinga okwesembethi maqindi ukuthi fuku
Into ebusineka enephaphu elibizela ngamandla
Sabona nje akuntsuku zatywala, ixesha lixheshile.
Sithe sisabuzana impilo, sichaz’ imvelaphi nendlela
Yasuka yabhonga intwazana, yehla ngesihlalo sayo
Yongxatha wavulek’ umthombo wesibeleko, lixesha
Sajongana singamanina, bakhwelel’ abasebuhlanti
Wamhlangabeza uDabaw’ omkhulu engacelanga
Wayalela lo na nalowo ngomzumzwana kwacaca.
Kulonkquleqhu sibuye nesibuthu-buthu sosana
Wavakala obebelekisa esithi “enkosi kwedini”
Zange ndabelikisa umntwana lula oluhlobo
Thyini uze nosana oluyindodana oluphilayo
Into ezandla zizigxadavu, enombomb’ oqhoshayo.
Ingafana ithi lenkwenkwe yethu Bhuti ayiyo
Mhlawumbi ibingeyiyo yodwa kulanzwakazi
Kodwa lona usana luyintama twatse ebisenzeka
Phaya kanye entla kwamasimi phakathi kwesisibini
Masivumeni inyaniso mawethu, sonakalisile
Singekathi sakubona esaneni suka inyani yazizala
Kwedini kaBhuti, awuzizelanga nje, uzele noYihlo.