Hamba juba bayokuqhuth’phambili
Noma uyobaqhutha phambili.
Ngincengile futhi ngilwile
Kodwa anginqobanga.
Impi ebengiyilwa ibidinga ibutho
Laba bili kuphela
ngoba owesithathu ubezoyona.
Ngilalile ngingadlile
Hayi ukuthi imali bengingenayo.
Zingiphelela ingub’zokugqoka
Kodwa angizithenganga.
Injabulo yakho ibiphambili
Eyam isemuva.
Bekungijabulisa ukuthokoza kwakho
Ngikhohliwe ngokwami.
Ngibaqhelisile ebebengivula amehlo
Ngithi bangenaphi othandweni lethu.
Ngiwubonile umon’ubhaliwe
Enkulumeni zabo
Ngathi abakufuni.
Ongafuni wena ubengafuni mina
Ngoba wena ubuyimina kimi.
Uyiphilile inhliziyo yam
Ngikuthanda ngothando olungenasikali.
Noma usungahamba
Angezi ngikukhalele.
Kepha ngokhalela isikhathi sam
Sokuthanda wena ungangithandi.
Aseshabalele amathemb’othando
Abayokulama bayongixolela.
Uma ibhubesi elikhandwe uwe
Selibamise ngomlenz’owodwa
okweqhude lenkukhu libik’sihlobo.
Hamba juba bayokuqhutha phambili
Noma uyobaqhutha phambili.