Bakusunduzele kude le!

Bakutjatha njengo mgodla, bakutjhiya lapho.

Enarheni ebasa njengembawula.

Enarheni eneenthelo zameva.

Laphaya bewembethe Itjhaluza nomkhombo.

Laphaya phetjheya bewengamele isikghwa sabokhokho.

Namhlanjesi nakhu, uyimvelakancani endabukweni.

Gadesi ugadanga ngemibandela nemigomo yemizanda.

Sebazibulungele khona bobuso abungalalwa ziintonga.

Abondlebe zikhanya ilanga, sekwaba ngibo abaphakathi

 Komhlana nembheleko ephasini likarhoboyi nembiqana.

Bayithebulile kaMabusabesala

Kungakho nje, gadesi sithenga ngitjho nesokuphemba.

Lesi esivuthisako eziko sesiyasitlhoga.

YakaNyabela bayisunduzele emaweni.

Izinto zesikhethu sezahlala ngekampeni.

Lami ithemba ngilibeke kwetja intanga.

Umtloli: Themba Emanuel Mashobane