Modiegi o gotše e le lekgarebjana la go ba le maitshwaro a mabotse. A rata batho ka moka ebile a thuša gohle mo a kgonago. E be e tloga e le karabo go bao ba hlokago maele ka tša bophelo. Le ge e be e sa le moswa, o be a kgona go aga batho ba bantšhi megopolo le go ba fa tlhohleletšo. Seo se be se dira gore bakgekolo ba bantšhi ba be le takatso ya gore e be ngwetši ya bona.

“O agegile kgopolo ngwanatena. Nke o ka nyalwa ke leitšibolo la ka , Matome. Ke lesogana la go loka kudu.”. Mokgekolo Emely o ile arealo ka lemyemyelo.

Ka ge Modiegi e le kgarebe ya go hloka mathata, o ile a bona go ka kgahla kgoro go tšea kakanyo ya mokgekolo Emely.

” Ga e ba morwa wa gago o na le kgahlego gonna, a tle gonna re boledišane. O tloga o lokile kudu, koko. Mohlomongwe le yena o latile wena”. Arealo nke o a swaswa.

“Ka nnete?” . Emily arealo ka makalo.

“A ke swaswe mma”. Arealo a tiišitše.

Matome o kopane le Modiegi gomme ba bolela. Ba feleletša ba ratane. Ge nako e eya ba nyalana. Ditaba tša bona di be di kitima ka lebelo mo ba nyalanego ka kgwedi ya boraro morago ga gore ba tsebane. Bona e be e le baratani bao ba thabilego.

Bjalo bophelo bja fetoga ge bjo eya pele. Ruri dilo tša go makatša di a direga. Matome o be a enwa bjala. Ge a nwele e be e le mathata a magolo. O rile go nwa tšatši le lengwe, a wela tseleng. Ke ge sefatanaga se mo thula. Ya ba gore o kitimišetšwa sepetlele. Ge Modiegi a fihla sepetleleng a tšholla meokgo ka letšhogo la go bona ka fao a gobetšego.

” Ruri monna wa ka a ka thulwa ke sefatanaga ga sehlogo ka tsela ye! Ngaka thuša monna wa ka hle!”. Modiegi arealo a lla.

Morago ga dibeke a eya go hlola monna wa gagwe, o ile a makala go tšwelela monna yo mongwe wa go ema ka maoto. O be a tsamaya ka sefatanaga sa majabajaba. Ntle le go tšea sebaka, o ile a ntšha maikutlo a gagwe go yena.

” Ke kgale ke nyakana le naletšana ya ka yeo ke e bonago ditorong. Ke a go rata gomme ke nyaka go go dira mohumagadi wa ka.”. Monna arealo ka boletiana a mo lebeletše ka mahlong.

O ile a mmotša ge e le kgale a lora ka yena. A re se se dirageletšego Matome, se diregile ka lebaka ebile a se phošo.

“Monna yo a lego ka mo sepetlele, o tlo fola. Seo a swanetšego go se thabela ke go fola a boela gae empa wena le yena le ka se boelane la ba mmogo. Le yena o se tseba gabotse seo”. Monna arealo a seka meokgo.

A tšwelapele.” Se se diregilego, ke ka lebaka la gore ke nako ya rena ya gore re kopane”. Ke ge a tšwelapele go mmotša gore lenyalo la go beakanyetšwa a se lona.

Modiegi o ile a tlabega. “Ke mang a boditšego monna yo wa digauta ka ganong gore nna le Matome re kopantšwe ke mmagwe?”

Ga e sa le a bea letsogo molomong. Ruri dilo di a direga.