Zwoluga ndi musidzana wa miṅwaha ya fumbimbili. Hayani ndi Nzhelele. Fhedzi o alutshela ngei vhurwa he a vha a tshi dzula na khotsi awe vha si vha malofhani na mme awe khathihi na vharathu vhawe vhavhili. Vho vha vha tshi dzula kha nnḓu ya masennge i re na phera mbili. 

Zwoluga o dzhena tshikolo Ṱhohoyanḓou Primary School. O vhonala a musidzana a re na vhukoni na nḓivho nnzhi siani ḽa pfunzo. U bva afho o ṱhaphudzela Flavius Secondary School. 

Musidzana o ri u thoma gireidi yawe ya vhuṱahe a vho thoma u tshimbila nga mulenzhe u si wone zwo vhangwa nga khonani dze a vha a tshi tshila nadzo tshikoloni. 

Zwoluga na khonani dzawe vho vha vho lindela zwiendedzi zwine zwa vha dzhia u bva tshikoloni zwa vha vheya vhuponi havho u ya nga u fhambana. Ho mbo swika muṱhannga mulapfu a na khonani dzawe a fara Zwoluga tshanḓa. Musi Zwoluga a tshi sumbedza u hana, khonani dzawe dzo muṱuṱuwedza uri a tende a litshe u ḓiita tshiḓahela. Zwoluga o mbo ḓi tenda; u bva ḽeneḽo ḓuvha a isa phanḓa na zwa lufuno na uyo muṱhannga. 

Zwo ḓo pfisa Zwoluga vhuṱungu musi uyo muṱhannga a tshi vho pfana na muṅwe musidzana hanefho tshikoloni. Zwoluga a ri u pfa ayo mafhungo a lila a si na mufhumudzi. Musi ho no fhira maḓuvha mararu uḽa muṱhannga a ḓa kha Zwoluga a humbela pfarelo, ene a mu farela. Vha isa phanḓa vho ḓi takalela.

Zwa ngafhi! Muṱhannga uyu we Zwoluga a vha a tshi khou seisana nae a mbo vhifhisa uḽa muṅwe musidzana wawe muvhilini, zwa vha zwo tshinyala. Zwoluga a tshi tou zwi wanulusa a dinalea. Zwa mu vhaisa mbiluni; zwa mu ondisa. 

Nga muraho ha vhege tharu a tshi khou ḽa mbilu, Zwoluga a limuwa uri a sa tou ḓivusa ene muṋe, u ḓo ṱwa e fhasi ngeno uḽa muṱhannga a tshi khou ḽa a fura a ḓitakalela. Zwoluga a mbo dzhia tsheho ya u ḓibvisa kha khonani mmbi dzi muṱuṱuwedzaho u ḓidzhenisa kha zwa lufuno ngeno ene muṋe a sa athu u lugela izwo. A fhedza a dzhia tsheho ya u ḓibvisa kha zwa lufuno u vhuya u swika a tshi khunyeledza pfunzo dzawe. 

O zwi vhona uri mafhungo a lufuno a ḓi ṱoḓa wo ri aluwi nyana, u itela uri u tshi ṱangana na khaedu ifhio na ifhio u kone u imedzana nayo. U bva tshe Zwoluga a ḓibvisa kha khonani mmbi na u thoma u ḓiimisela kha zwithu zwawe zwa tshikolo o thoma u vhona maraga dzawe dzi tshi ya nṱha. Izwo zwone zwo takadza na vhabebi vhawe na vhadededzi vhawe. Nangoho o phasa Gireidi 12 nga maraga dza nṱhesa ngeno mvelelo dzawe dzi tshi tou penya-penya.