Banyalani bao ba nyalanego mengwaga ya go feta ye mehlano ba be ba hloka thari. Mosadi e lego Lerato, o be a itshepela go morena ka ge e be e le Mokriste wa go tia tumelong. O be a ineetše go Morena ebile a ipotša le go tshepa gore ngwana o tla tlišwa ke Morena ka nako ya gagwe.

“Se sengwe le se sengwe maphelong a rena se phethagatša ke Morena ka nako ya gagwe. Ke yena a swerego maphelo a rena ohle. Ka le lengwe la matšatši o tla mpha lesea bjalo ka ge ke le hloka”. Lerato o be a tla realo ge a dutše a nnoši.

Monna wa gagwe e lego Thabo, o be a dumela go dingaka tša setšo. Rakgolo wa gagwe e be e le nkadingala wa matwetwe tikologong. Ka fao o be a rata setšo ka pelo ya gagwe yohle. O be a se tshepa ebile a dumela gore se mo swaretše mahlatse le mahlogonolo.

“Ke badimo ba gešo fela bao ba ka lokollago masea a ka. Mosadi wa ka o thibetšwe go kgona go swara masea. Seo ke swanetšego go se dira ke go bitša nkadingala gore a tle a mo kapiše. A gona gore mosadi wa ka a ka hloka pelego,” Thabo a realo a dutše sofeng a nnoši.

E be e le mosegare ge Thabo a tshwela mosadi wa gagwe wa seponono ka mantšu.

“Mogatšaka, ke kgale re leka go hwetša ngwana. Bjalo ke a bona gore go a pala. Ke ka lebaka la gore badimo ba re furaletše. Ke be ke naganne gore re etele nkadingala,” Thabo a realo.

“Mehlolo! Ke dilo mang tšeo o di bolelago? O tla mpotša gore o dumela gore batho bao ba hlokofetšego kgale ba sa na le seabe maphelong a rena? O seke wa dumela moya ye mebe e raloka ka wena,” Lerato a realo a šorofetše.

“Empa ke kgale re hloka masea. O nagana gore ke ka lebaka la eng?” Thabo a realo a sentše sefahlego.

“Ke ka lebaka la gore morena ga se a lokolle nako ya gore re be le bana. Ge a sa ba a dumela, ga go yo a dirago selo. Le badimo bao ba gago ba ka se kgone selo.” 

“O rata o sa rate, re ya go bona nkadingala. O yo go kapiša ebile a go hlapiša. Ke kgopela gore o kwešiše kgopolo ya ka.” 

Lerato o ile a ikwa nke o rwele setena hlogong. Monna wa gagwe o be a tiišitše ka ganong ge a bolela. Ka ge e le yo mošweu ka mmala, o be ebile e le yo mohubedu. A befetšwe a befedišitšwe ke gore mosadi wa gagwe ga a minile le yena ka nko e tee.

Ka morago ga beke, Thabo o ile a etela nkadingala Somkaka. Ga se ya dikadika ya ba e tšholla ditaola.

“Bobedi bja lena gore le hwetše lesea, le swanetše go hlapa senyama. Le orele dipowana ebile le peitiwe. Bobedi bja lena ba le gatišitše senyama. Ke sona se jago bana ba lena,” Somkaka a realo.

Thabo a dumela ka hlogo. ” Ke a kwa Makhosi!”

“Le na le bothata bjo bogolo. Le na le bothata,” arealo a tsene ke moya wa gagwe.

Thabo ge a etšwa ka kgoro ya nkadingala o be a sa tsebe gore o yo thoma mosadi wa gagwe kae. O tseba gabotse gore ga go yo ba bonolo gore Lerato a dumele, eupša mafelelong ba swanetše go ipona ba rarolotše bothata bjoo

Mafelelo