Lesogana le pakile merwalo ya lona gomme le lebile boemadithekisi bja tikologo. Ke mosegare wa sekgalela gomme tladi e amuša tatšane. Ka leina lesogana le la go ema ka maoto ke Donald. O phethile lengwalo la gagwe la marematlou gomme o paletše go ya dithutong tša godimo ka lebaka la tlhokego ya mašeleng. Ga go nko ya go tšwa lemina go taba ya mešomo go yena gomme o nagana go leba mo banna ka moka ba lebago gona, Gauteng. Ge a gopola ka go tsamaya, pelo ya gagwe e a hlobaela ka go gopola lekgarebe la gagwe, Moeketšeng. Ke lekgarebjana la gagwe leo a thomilego go ratana le lona.

“Moratiwa, ke eme mo boemathekisi. Ke kgopela go tla go laelana le wena gobane ke ya Gauteng go yo sela. Nka rata gore o mphe tladimolongwana ya gore ke tsamaye ke sa belaele selo”. Arealo Donald mo mogaleng.

Moeketšeng ga se a tšea le metsotso e mehlano. O fihlile ka metsotso e mene. O be a dula kgauswi le boemadithekisi kudu.

” Ke rile ke tle ke bone lesogana la ka ge le tsamaya”. Arealo ebile a mo atla.

Ba atlana ka katlo ya baratani.

” Bjalo ge o tsamaya o yo boa neng?” Moeketšeng arealo a seka meokgo.

“A ke na bonnete empa ke yo boa bophelo bja ka bjo fetogetše go bjo bokaone. Ke tla be ke na le tšhelete ya magadi gomme ka tla ka go nyala. Ka go dira bjalo, ke tlo hwetša taolo ya gore ke go tšee re yo dula mmogo kua ,Gauteng” . Donald arealo a myemyela.

Moeketšeng a myemyela empa meokgo e sa ntše e tletše ka mahlong a gagwe. O be a bontšha a ineela ka lerato la bona. Ka go le lengwe o be a felela ke tshepo.

” Go yo direga eng ge o yo hwetša makgarebe a mangwe a go mphala ka bobotse kua o yago gona? Nna ke felelwa ke tshepo ka lerato la rena?” . Moeketseng a lla.

Donald a mo gokara gomme le yena a tsorotla meokgo. Meokgo ya elelela hlogong ya Moeketšeng gobane ke yo mokopana. Meokgo ya Moeketšeng yona, e be e elelela sehubeng sa Donald. Go bile setu gomme bohle ba le bohlokong bja go kgaogana ka lebaka la mošomo.

Donald a phumula meokgo gomme a lebelela lekgarebe la gagwe le lesehlana ka mahlong. O be a ikana go mmotšha tshepišo yeo a ikanago ka yona ya lerato.

“Moratiwa, ke go rata ka lerato la moswananoši. O kgopo ya dikgopo tša ka. O letšoba la ka. Ke tlo go rata motsotso ka motsotso. O le gona kgauswi lenna goba o se gona. O lebaka la gore ke ikwe ke phela ebile ke na le mafolofolo a go leba Gauteng go nyaka mošomo. Ke ka lebaka la gore ke nyaka go go nyala. Ke nyaka go go dira wa ka mohumagadi. Hle ke kgopela gore o boloke lerato la rena. O se le hweletše. Ke tla dula ke na le wena mogaleng. Ke tla dula ke go gopola. Ke kgopela gore o se ke wa fa lesogana le lengwe pelo ya gago nna ke sa le gona. Ke ya go rata.”

Moeketšeng a mo lebelela ge a ikobile ebile a sekile molala. Ntle le go bolela a mo atla.

“Ke a go rata Donald. O nthutile lerato. Ke tla dula ke go rata. Ke a tshepiša gore ke tla go emela mohla o boa gomme ra tšwetšapele lerato la rena.”

Ba myemyela gomme ba atlana leboelela. Ba rile ba sa fana tladimolongwana, ya ba gore thekisi e a tšwelela. Ba swarana ka matsogo.

“Tshepišo ya ka ke ya gore, ke tla dula ke go rata. O šale gabotse”. Ya ba o ya go namela thekisi. Moeketšeng a šala a lebeletše thekisi e tsamaya.