Ke be ke re ke a raloka empa ngwana a wela ka gare ga mpa ya ka. Ka ikhumana ke le motho wa kgobe ka mengwaga ye masomepedinne. Go ntšha mpa ga se gwa ntlela gobane ke dumela gore ngwana ke mpho go tšwa go Modimo. E re ke le botšeng ka nna Molebatši ngwanenyana wa leemo le lebotse. 

Ke yo mošwaana ka mmala mola ke le yo mokopana ka seemo. Ke swanelwa ke diroko le dikhethe tša go fapana. Leemo la ka ke lela la go ema go laetša gore ke mosadi wa moAfrika. Theka la ka ga o tsebe go le bona ge ke sepela. Hlogong ke kota letwadi ka dio ba sephalaphala. Le bao ba tšhelago meriri ya dipere ke ba rapalatša fase ka bobotse.

Ke rile ka tšatši le lengwe ge ke le ka gare ga toropo, ka kopana le lesogana le lengwe ba le bitša Ronny. E be e tloga e le lesoganammele la go ema ka maoto le lona gomme le bogega kudu. Le ge a be a le bjalo, o be a apere diaparo tšeo lekgarebe le lengwe le le lengwe le ka se ratego gore monna wa lona a ka di apare. Ke sa tsebego makgarebe a mangwe gobane a re swane. Nka dio bona o ka re motho yo mongwe go nna ga a botse mola go ba bangwe ba bona monnanna. O be a apere borokgo bjo bokopanakopana le sekhipha sa go šia dimpa mola maotong e be e le dinapshenapshe. 

Ke rile ke sa mo lebeletše ya ba gore o tla mo go nna gomme o mpotša ka fao a nthatago ka gona. 

“Ke go rata ka pelo ya ka yohle. Ge ke go bona ke bona lengeloi la go tšwa legodimong.” 

Ke ile ka se tsebe gore ke reng. Ge ke mo lebelela gape ditsebeng o thutše mangina a basadi. Bathong! Ke reng ge ditaba di le ka tsela ye? Ke lesogana la go ratega empa moaparo wa gagwe o a ntlhola. Ke palelwa ke go mo amogela.

Le ge go le bjalo o ile a nthapela ka maleme ka moka gomme ka feleletša ke dumetše. Ke be ke kgahlwa fela ke gore o na le difakha gomme ke nyaka go hwetša borutho bja matsogo a gagwe. E be e le Labohlano gomme a nkgopela go ya le yena moketeng wa mogwera wa gagwe wa matswalo. Ka ge ke be ke sena mo ke yago gona, ka napa ka mo šala morago. Re fihlile ra keteka gomme ra ipshina kudu. Bagwera ba gagwe ba be ba le boletiana empa ba apara go dio swana naye. Meaparo ya bona ga ke e rate e le ruri.

Morago ga gore re nwe madila, ke ge re robala gona moletlwaneng. Ke gopola a nkukile ka difakha tša gagwe a nkiša borobalelo bja gagwe ka ge ke be ke tagile. Go rile go sa, a mphelegetša go ya gae. Ijoo! Ke feditše matšatši a lesome. Ke ge ke ekwa gore mothwana o wetše ka teng ga ka. Ke be ke raloka nogana ya wela. Ke gakanegile lehono gomme wa go mo sola ga a gona. Ke ikgethetše go ya gona kua moletlwaneng le motho yona yela. A naa motho yola nka mo phara ka molato wa kato gobane ke be ke tagilwe? Ke potšišo yeo ke ipotšišago yona empa a e mpee ka gare ga kgatelelo ya monagano ga kaalo. Ke mengwageng ya go itšeela maikarabelo ebile dilo ka moka re dumelelane gomme e dio ba gore ke be ke nwele mabelemabelegabatho.

Ke rile ge ke boela go lesogana lela go mmotša gore ke mmeleng, ka hwetša ditaba tša go ntlala dimpa. Lesogana la mpotša serokaphatla gore yena ke lesogana ebile o ratana le masogana. A re o ikwa e le mosadi empa tše di diregilego o be a dio re o a raloka mola le nna ke be ke raloka. Ka inamiša sefahlego gomme ka thoma go nagana moaparo wola – moaparo o a bolela. Moaparo o hlaloša motho. Le ge go le bjalo thekgo yona o ile a ntshepiša.