Ke be ke sa gopole gore ka le lengwe la matšatši nka tsoga ka gare ga kgolego. Ka gare ga ntlo ya go tlala ka leswiswi moo go se nago nako ya go iketla ka tokologo ya bophelo. Ke be ke sa gopole gore nka kgaogana le meloko ya gešo kudukudu ngwana wa ka wa lekgarebjana le mmagwe e lego Seponono. Ke a itshola le gona ga makgolokgolo. Ke be ke sa gopole gore kgolego e ka ba legae la ka. Mo nka aparago diaparo tša mapantiti. Serutegi sa go swana le nna se tsene bjang ka gare ga kgolego?

Ke be ke nwele madila ge bophelo bja ka bo fetoga. Ke sa tšwa go gola mogolo wa ka wa mathomo mola ke hwetšago mošomo bjalo ka moeletši wa mašeleng. Ke be ke se motho wa go ikabela bjala empa tšatši leo ka re nke ke ithabiše gobane ke gotše ke sokola. Ke sa kgone go ithabiša. Ka re go šoma ka reka sefatanaga. Ke seo ke dirilego  kotse ka sona ka feta ka maphelo a batho ba šupa. E be e sa le se se swa,se na le lebelo la godimo. Ka re go nwa bjala ka se raga gore se ye mo se ratago.

Ke mmolai wa wa mengwaga ye masomepedihlano; mmolai wa moswa. Ke sentše bokamoso bja ka. Lekgarebjana la ka ke le šiile nyanyeng. O be a tsena sekolo gomme ka mo senyetša ka go mo fora ka lenyalo. O dutše gae gabjale, ke motswetši yo motala ka ngwana wa ka. E be e le maikarabelo a ka go mo hlokomela ka ge ke mo tshepišitše. Ga a na batswadi ke tšhiololo ya go topa tša fase. Yena ke a mo rata ebile nka se emiše go mo rata. Ke be ke re mafelelo a ngwaga wo ke a mo nyala. Bjalo ke mogolegwa ke golegetšwe go bolaya batho ba šupa ka palo. Ke polao yeo e sego ya maikemišetšo.

Bjala le tsela a di tsamaelane. O se ke wa tsoga wa nwa madila, wa otlela. O ka tla wa feleletša o etša nna ka mo gare ga kgolego. Ke hlapa ka meokgo bophelo bja ka bo eme. Bja ka bokamoso bo senyegile. Sello ga se kgole ka selo gobane ke ngwadilwe polao sefahlegong. Malapa a lobile meloko ka nna. Mola kesa nwe bjala nka be ke se mo ke lego.