UThando noNandi bamile ekhishini lomuzi wabo we-RDP ngosuku lomngcwabo kaZikhona. UNandi uyamamatheka.
“Uhlekani kodwa Nandi?” kubuza uThando.
“Ngiyacabanga, Thando, ukuthi kufana naye uZikhona ukuthi asifundise isifundo noma engasekho emhlabeni.”
“Ukhuluma mayelana nani ngempela?” UThando ubukisisa uNandi. Udidekile, akazi ukuthi ukhuluma ngani udadewabo.
“Ngisho ukuthi uZikhona usikhombisa ukuthi uma uziphatha kahle abantu bakuthanda ngokweqiniso. Buka nje umngcwabo esimenzela wona uZikhona, ungafunga ukuthi kungcwatshwa indlovukazi kodwa asikhiphanga ngisho isenti leli. Abakwa-Hamilton, abangani bakhe ngisho abantu esingabazi bafake esivivaneni ukuze simungcwabe ngoba ubeziphethe kahle.”
UThando umamatheka okokuqala selokhu kwashona udadewabo. “Uqinisile Nandi. Indlela umuntu aziphatha ngayo ibalulekile.”
UThando uyajabula ngoba uNandi useyabona ukubaluleka kwesimilo esiqotho empilweni.
“Ingakho kumele siziqinise namuhla,” kuqhubeka uNandi. “Noma usudlulile umgcwabo siqikelele ukuthi siphila impilo eqotho.”
Baziphatha ngesizotha emngcwabeni kaZikhona. Bayaziqinisa. Kuyasiza nokuthi abantu abakhulumayo emngcwabeni bagqamisa okuhle kodwa ngempilo kaZikhona. Akekho noyedwa okhuluma ngesihluku abulawa ngaso. Umngcwabo uphenduka ube ukubhiyozela impilo kaZikhona.
Ntambama uThando uhlala emuva kwendlu aphendule imilayezo yenduduzo egcwele kwi-Facebook Page yakhe.
“Thando,” kusho isihosha sezwi lomngani wakhe uAlbert. “Sishayile isikhathi sokuhudula lesi sikorokoro somzimba wami ogugile ngigoduke. Sekuyabanda.”
“Ngiyabonga ngakho konke ongenzele khona njengoba sibhekene nalesi simo, Albert,” kusho uThando.
U-Albert udonsa isihlalo, ahlale eduzane noThando. Ubuka uThando emehlweni, athi, “Kodwa unjani, mfana omdala?”
“Kulukhuni Albert, mngani wami. Kodwa ngiyazama.”
“Ngiyabona. Uqine, mfana wami. UNkulunkulu uzokubheka. Ahamba kanjani ama-application asenyuvesi?”
“Isikhathi sisekhona ngoba kusawu-June. Ngizoyithumela eyami uma sekuvulekile.”
“Usafuna ukufunda khona e-UCT?”
“Yebo, Albert. Kodwa sengizofundela enye i-degree.”
Amangale uAlbert.
“Ungakhathazeki, Albert, ngisazofundela ukuba ummeli,” kusho uThando. “Kodwa manje sengizokwenza i-criminal law manje, hhayi i-corporate law. Ngifuna ukuqikelela ukuthi abadlwenguli nababulali bayaboshwa.”
“Kuhle, mfana omdala. Ngiyazi ukuthi uzophumelela noma ungakhetha ini,” kusho u-Albert exhawula uThando.
***
Sitshele: Kungani u-Albert noThembi bengabangani abalungile kuBookworm noma bebadala kunaye?