Kwakukhona imibhede emibili egumbini lethu. U-Owethu wazumeka komunye umbhede. Sahlala sibambene noLinda isikhathi eside komunye umbhede. Ngamxoxela konke okwenzeka mhlazane sibamba inkunzi. Ngamxoxela nokuthi uMdu noPadlock babengisabisile ngokuthi bazolimaza yena no-Owethu uma nginqaba ukuhamba nabo siyobamba inkunzi. Ngakhihla isililo isikhathi eside sibambene noLinda emuva kokumxoxela konke okwenzeka.
“Isifanele lenhlanhla esivelele, Spha,” kwasho uLinda. “Kuthiwa uNkulunkulu usebenza ngezindlela ezifihlekile.”
“Bebungekho ubuNkulunkulu kulento engiyibonile, Linda. Ngibone izinto ezinyantisa igazi.”
“Kodwa kulokho kunyantisa kwegazi wena usindile. Yonke imali ikuwena, Spha.”
ULinda wangiphakamisa isilevu ngoba ngangibheke phansi, wangesula izinyembezi.
“Akukho okungalungile okwenzile, Spha. Uyangizwa? Wenze obekufanele ukwenze ukuze uvikele umndeni wakho.”
“Yebo, sthandwa sami, ngiyezwa. Futhi konke kuhamba kahle ngoba bonke abantu abakade bazi ukuthi ngiyabandakanyeka kulelicala bashonile. Noma kukubi ukuthi bashonile kodwa ngizizwa ngikhululekile.”
ULinda wanikina ikhanda, waphefumulela phezulu.
“Eish, Spha.”
“Yini, sthandwa sami?”
“Ngesikhathi ngizwa ukuthi uMdu noPadlock bashonile ngazulelwa yikhanda. Ngahamba nginhlanhlatha ngibuza ngawe ngagcina sengifike emndenini kaMdu.”
Ngathwala izandla ekhanda, ngathi, “Hawu kodwa, Linda!”
“Ngangikhathazekile, Spha. Ngangifuna ukuthola ukuthi wena ukuphi futhi usesimweni esinjani. Ngangicabanga ukuthi nawe ushonile njengabo!”
Isililo sikaLinda sankenenza egumbini. Ngabona u-Owethu enyakaza esebuthongweni.
“Yehlisa umoya, sthandwa sami,” ngabamba uLinda ngamsondeza esifubeni. “Yehlisa umoya, ngiyakucela. Wafica bani?”
“Ngifica bani kuphi?”
“Kubo kaMdu.”
“Ngafica abafowabo.”
“Kusho ukuthi abafowabo sebeyakwazi, bangakukhomba?”
“Yebo, ngabanika igama lami nenombolo yocingo. Ngabanika nekheli lasendlini ukuze bakwazi ukufika uma kukhona abakuzwile ngokuthi ukuphi futhi kwenzekeni ngawe.”
“Eish, Linda!”
“Yini, Spha? Ikuphi inkinga? Angikaze ngibone amehlo akho egcwele ukwesaba okungaka!”
Ngabe sengithule du emuva kokuzwa uLinda echaza.
“Yini, Spha?” uLinda wanginyakazisa amahlombe.
Ngathi, “Abafowabo bayinkinga, Linda. Bayamdlula uMdu ngobundlavini.”
“Kwakufanele ngenzenjani, Spha? Wangishiya ungangichazelanga lutho,” uLinda waphendula sakuhleba.
“Wenza lokho owawungakwenza esimweni owawubhekene naso, sthandwa sami.”
“Mina ngibona ukuthi kufanele ubathsele abafowabo baMdu ukuthi kwahamba kanjani enkunzini. Ngambona lo okuthiwa uMpilo. Lo onomoya ophansi, ogqoka izibuko zamehlo. Ubukeka sengathi ungumuntu oqotho.”
“Uyena oyinkinga kakhulu uMpilo. Uyazi ukuthi kwenzeka kanjani ukuba agcine enamatekisi?”
“Cha, Spha. Angazi.”
“UMpilo waba namatekisi esemncane ngeminyaka. Ubaba wakhe wayenamatekisi amabili kuphela. Ubaba wakhe wadutshulwa washonela esangweni lomuzi wakhe. UMpilo wayeneminyaka engu 19 kodwa wakwazi ukuthungatha umkhondo, wathola ukuthi ubani owabulala uyise. Kwatholakala ukuthi ikomiti elaliphethe omunye umzila wamatekisi okwakubangwa nalo imizila yilo elakha itulo lokuba abulawe uyise. Uyazi ukuthi uMpilo nabafowabo benzani?”
ULinda wanikina ikhanda.
“UMpilo nabafowabo bawabulala wonke amalunga alelokomiti. Bawuthatha ngendluzula umzila owawuphethwe yilelokomiti. Sekuphele iminyaka engamashumi amathathu bewuphethe lomzila. Bangabantu abanesihluku labantu, sthandwa sami.”
“Ngiyaxolisa, Spha. Bengingaqondile ukuba abafowabo baMdu bazi ukuthi ungubani. Bengikhathazekile. Bengicabanga ukuthi ushonile futhi kukhona abakwaziyo mayelana nalokho. Bengithi nawe ushone wedwa esigangeni njengoMdu.”
“Ngiyezwa, sthandwa sami.”
“Kodwa akuwena obulale uMdu noPadlock. Abafowabo bazokuzwa uma ubachazela njengoba nami ungichazelile.”
“Angazi ukuthi bazocabangani abafowabo. Bayizinswelaboya futhi izinswelaboya zinendlela yazo ehlukile yokubuka izimo. Kanti futhi nokushonelwa kwenza abantu bangacabangi ngendlela eqondile. Abantu abashonelwe bahleze befuna umuntu abazomsola. Ngesaba ukuthi mhlawumbe abafowabo baMdu basola mina ngokufa kwakhe.”
Sitshele umbono wakho: Ubona ukuthi uSpha uqinisile ngendlela abeka ngayo ngokucabanga kwabafowabo baMdu? Ngabe kuyiqiniso ukuthi ‘Abantu abashonelwe bahleze befuna umuntu abazomsola’ ikakhulukazi esimweni esinjena?