Labobedi, 9 Febereware 2016
9.00 a.m.

Nolitha o ile a ema ka ntle ga phapoši ya borutelo.

Naa o ile go botša baithuti eng? O ile go thoma bjang go hlaloša seo se hlagilego?

Nnete e ka ba boima, Noli wa ka yo monnyane. Efela ka mehla ke tsela ye kaone. O kwele mantšu o kare tatagwe o eme gona fa kgauswi le yena. Ke kgale a ba šiile, o tlogetše mmagwe e le mohlologadi wa bana ba bahlano gore a ba hlokomele.

Nkabe tatagwe a le gona gore a boledišane le yena gona bjale. Efela, o swanetše go tielela gomme a lebane le ba mphato wa gawe. A ba botše nnete.

O ile a gogela moya teng, a lekanyetša magetla a gagwe gomme a tsena ka phapošing ya borutelo.

Mohumagatšana, Mohumagatšana.” Sefahlego sa Fungile se be se tletše ka mahlajana. “Dubula le Faniswa ba re le gatee ga o na lesogana, efela ke ba boditše gore Mohumagatšana Solani wa rena o botse kudu go ka intšha le lesogana la go hlalefa mo polokong. Ane, Mohumagatšana? Ga go bjalo, Mohumagatšana?”

Nolitha o ile a myemyela ka go lapa. Ye ke thaloko yeo ba e ralokilego ngwaga ka moka wa go feta, ebile e fetetše go wo. E re Mohumagatšana a re botše ka bophelo bja gagwe bja sephiri, kgole le mo sekolong. Go ena le gore a boledišane le bona ka seo, a emiša seatla.

“O phetše gabotse, Mohumagatšana?” Lentšu la Dabula le be le tshwenyegile. “Re be re dira metlae feela. Re be re sa nyake go go befedišwa.”

“Aowa, aowa, ga se lena, Dubula. Efela o be o bolela nnete. Ke befetšwe.”

Mphato o ile wa re kgwathi.

Nolitha o ile a ithekga ka teseke ya gagwe, a lemoga ka mo e kwagalago e šikenyega kudu le go feta mehleng mesong ye. O ile a gopola kantoro ya Mna Mahlangu gomme a šinyalala. Dirantanyana tše makgolo a mahlano. Le gona e ka no se lekane le go reka mosamelwana wa sofa ya gagwe goba go tlatša Senamelwa sa gagwe sa Ntatauwane ka petrole.

“Ke le swaretše ditaba tše dimpe, mphato,” a bolelela tlase. “Gomme ke tloga ke swabile kudu.”

Labobedi, 9 Febereware 2016
9.20 a.m.

“Seo ga se maleba!”
“Yeo e be e le tšhelete ya rena!”
“O nagana gore ke—”
“A ka se no—”
“Mohumagatšana, Mohumagatšana, a ka se dire se, ga go bjalo?”
Nolitha o ile a šikinya hlogo ya gagwe. “Aowa a ka se dire seo,” a realo. “Efela o dirile.”

Cebo le Adisiwe ba kgomaganya dihlogo, ba hebehebetša ka mothalading wa ka morago. O be a na le nnete ya gore Cebo o ntšhitše mogala wa gagwe, efela o be a lapile kudu go ka mo kgalema.
Nolitha o ile a lebelela bobedi bja bjona, rathutaboagi wa gagwe le ramahlale wa gagwe. Naa o tla ba tlogela bjang ka tsela yeo hlogo ya sekolo e dirilego? Go tla bjang gore a palelwe ke go ba šokelwa bokamosong bja bona? O ile a ka a tsenwa ke sehlabi sa go tsenelela a be a katakatela morago ka kgato e tee.

“Mohumagatšana? O na le nnete ya gore o phetše gabotse?”

“Ga ke na bothata, Babalwa.”

Efela ka kgonthe go be se bjalo. Nolitha o be a sa tsebe gore o tla tsoga a phetše gabotse gape.

“Ke maswabi, mphato. A re boledišaneng ka seo gosasa gape, mola ka moka re bile le sebaka sa go ka nagana ka se. Mohlomongwe go na le se sengwe gape seo nka se dirago.”

Nolitha o ile a nagana ka Jama. Ka nnete o tla ba le karabo ya gagwe? O tseba molao. J e be e le motho yo o ka yago go yena yunibesiting ka nako ya boipelaetšo bja baithuti. O be a tla tseba ge eba ba ka gapeletša Mna Mahlangu go buša tšhelete. Efela ge ba ka dira seo, Nolitha o be a tseba gore o tla latswa mošomo wa gagwe. Gomme bjale mmagwe o tla dira bjang? Go sa na le melomo ya go swarwa ke tlala ye meraro yeo e swanetšego go fepša, Nolitha. Le ge eba wena le Vuyi le a šoma, nka se kgone go dira seo ke nnoši. Dikiletšo tša bophelo bja Nolitha, tšeo a swanetšego go di theeletša go fihlela baratho ba gagwe ba bannyane ba fetša sekolo. E sego gore o a tshwenyega. Vuyi o thušitše go lefela grata ya gagwe ya yunibesiti, a tlaleletša dikgoba tšeo di tlogetšwego ke thušo ya mašeleng; bjale ke sebaka sa gagwe gore a thuše le yena.

Nolitha o ile a šisimoga ge a gopola ka mekitlana yeo a e ageletšego mo mengwageng ye mene ge a be a le yunibesiti. O be a ratile go dira mastase go swana le Jama le Nombeko, efela go be go sa kgonege. Ka mahlatse Mna Mahlangu o be se gona go akanya ka bokamoso bja ka, o ile a nagana ka kgegeo. Ge nkabe tšeo di le maatleng a gagwe ke be nka se tsoge ke tsene ka mabati a yunibesiti.

“Mohumagatšana? “ Mohumagatšana?” Nolitha o ile a bula mahlo a gagwe.

Cebo le Andisiwe ba be ba eme ka pele ga gagwe.

“O reng, Cebo? Ke eng?”

“Mohumagatšana, nna le Andi re be re nyaka go yo bona Mohumagatšana Nene ka ga protšeke ya rena ya Mahlale a Leago.”

Nolitha o ile a dumela ka hlogo. “Go bjalo. Ga ke nagana gore lehono re tla šoma.”

“Ke a leboga, Mohumagatšana,” Andisiwe a retologela lebating. “Ke maswabi. Seo a se dirago, ga se sa loka.”

***

Re botše gore o nagana eng: Ge nkabe o le Nolitha o be o tla ikwa bjang?