“A hi yeni, hinkwerhu!” ku huwelela Tin. “A hi tlangeleni! Kumbe mi lava We Can Band yi ta mi pfuna?”

“Ina, ina!” ku huwelela ntshungu.

Tin a languta ematlhelo. “Xana yi kwihi bende?” Hayikhona, a ndzi va voni helo. A ku na ntlangu loko bende yi nga ri kona. Ndzi ta kombela ku pfuniwa. I ntlawa ntsena lowu nga ponisaka norho lowu!” Tin a n’wayitela loko a languta ntshungu. “Xo sungula, ndzi lava vachayi va mindzhumba vambirhi.”

Neo na Hope hi vona va nga yimisa mavoko ro sungula. Loko va ri karhi va khandziya xiteji Tin u va tekile a va yisa eka swikotikoti swa mune swa kofi leswi nga na swipfalo swa pulasitiki. Swikotikoti a swi khavisiwile hi maphepha yo vangama na tikunupu. Nakambe a ku ri na tikhokho leti Neo na Hope a va ta ti tirhisa.

“Sweswi hi lava xikecekece,” ku vula Tin.

“Josh! Teka Josh!” ku huwelela Neo.

“Xana ku na Josh kwalaho? Xana u kwihi Josh? A ti haleni,” ku hleka Tin.

Josh a yimisa voko ra yena. Vavanuna vambirhi va n’wi tlakula hi whilichere yakwe a ya exitejini.

“Ha ku amukela, Josh,” ku vula Tin. “Ringeta swikecekece leswimbirhi.”

Josh a dzungudza xin’we a tlhela a dzungudza lexin’wana. A swi endla mipfumawulo yo hambana.

“Leswi swi kahle,” ku vula Tin. “SWESWI, A HI…”

Kambe loko a nga si heta, a ku ri na huwa ya tinsimbi. Un’wana na u n’wana a languta ematlhelo ku vona leswaku xana i yini.

Endzhaku Noodle a tsutsuma a tsemakanya xiteji, a ri karhi a kokakoka mathini lawa a ya bohiwile swin’we hi ntambhu endzhaku ka yena.

“Swinari!” ku huwelela Tin. “A ndzi anakanya leswaku ndzi swi lahlile.”

Bella a tsutsuma a kongoma exitejini. “Noodle!” a yi vitana. Noodle a tsutsumela eka Bella, mathini ya ri karhi ya banana endzhaku ka yena.

“A swi na mhaka,” ku vula Tin hi ku hleka. “Ndzi anakanya leswaku Noodle u lava ku va xiphemu xa We Can Band. Nakambe ndzi anakanya leswaku u lava na wena u tikatsa na hina,” a vula, a ri karhi a kombetela Bella.

Tin u pfunile Bella ku khandziya xiteji kutani hinkwavo va chuchile swinari swa thini leswi a swi ri emirini wa Noodle. Endzhaku Bella na Noodle va yile ku ya yima ekusuhi na Neo, Hope na Josh. Tin a chaya nkatara ya yena a ku, “VUNANGA A BYI SUNGULI!”

Loko Tin a ri karhi a kombetela Neo na Hope, va chaya mundzhumba ya vona. Kutani Tin a yimbelela, “Nenge wa ximatsi endzhaku,” a kombetela ntshungu.

“Nenge wa ximatsi endzhaku,” ku yimbelela ntshungu.

Lexi nga landzela Tin a kombetela Josh kutani a dzungudza swikecekece swa yena hi nkarhi lowu faneleke wa risimu.

“Nenge wa xinene endzhaku,” ku yimbelela Tin.

“Nenge wa xinene endzhaku,” ku yimbelela ntshungu.

Tin a kombetela Bella. Nongoloko wa swikotikoti swi banana kahle loko Bella a ri karhi a swi bananisa. Noodle a vukula hi ntsako.

Hi nkarhinyana ntlangu a wu hisa. Tin a yimbelela risimu ra yena loko Neo, Hope, Josh na Bella va ri karhi va chaya. Noodle na yena a nghenelela nkarhi na nkarhi hi ku vukula!

Endzhaku tiqambhi letin’wana yin’wana na yin’wana yi yimbelela risimu kusuka etikweni ra vona. Ntshungu wu khuzela na ku phokotela mavoko. A va rhandza nkombiso!

“Ma swi vona,” ku vula Tin a byela We Can Band, “ntlawa lowu wutsongo wu ponisile norho! Ndza mi khensa vamune bya n’wina … na Noodle, un’wana na un’wana u tiphinile hi ntlangu lowo hlamarisa!”