“Yenzani, noke! kwarhuwelela uTin. “Asigidingeni! Nofana nifuna i-We Can Band bonyana izonisiza?”
“Iye, iye!” kwarhuwelela isiqubuthu.
UTin waqala mazombe. “Iphi ibhendi? Awake, angibaboni ndawo. Akusiwo umnyanya nakunganabhendi. Ngizokudinga isizo. Siqhema kwaphela esingasindisa ibhudango leli!” UTin wamomotheka lokha nakaqala isiqubuthu. “Kokuthoma, ngizokutlhoga ababethiingubhu ababili.”
UNeo banoHope baba ngebokuthoma abaphakamisa izandla zabo. Lokha nabakhwelako baya esiteji uTin wabathatha waya nabo emabhlegeni amane amakhulu wekofi aneemvalo zeplastiki. Amabhlege la gade akghatjiswe ngamaphepha neenkunubhe ezinemibala ekhanyako. Begodu gade kuneengojwana zokubetha iingubhu ezizokusetjenziswa nguNeo banoHope.
“Kwanjesi sitlhoga umkhuhluzi,” kwatjho uTin.
“Josh! Thatha uJosh!” kwarhuwelela uNeo.
“Sinaye uJosh lapho?” Uphi uJosh? Asimletheni lapha phezulu,” kwahleka uTin.
UJosh waphakamisa isandla sakhe. Amadoda amabili aguga isitulomavilo sakhe asikhweza phezu kwesiteji.
“Wamukelekile, Josh,” kwatjho uTin. “Akhe uzame iinkhuhluzi ezimbili lezi.”
UJosh wakhuhluza sinye bese wakhuhluza nalesi esinye. Zenza amatjhada ahlukileko.
“Kuhle khulu,” kwatjho uTin. “KWANJESI, AKU…”
Kodwana ngaphambi kobana aqede, kwabanetjhada elikhulu eliketezako. Woke umuntu waqala mazombe ukubona bonyana kungaba yini.
UNoodle wagijimela ngale kwesiteji, adosa amabhlege abotjhelelwe ndawonye ngentambo amlandela ngemuva.
“Abotjherere!” Kwatjho uTin. “Bengicabanga bonyana ngibalahlile.”
UBella wagijima wanqopha esiteji. “Noodle!” wabiza. UNoodle wagijimela kuBella, amabhlege enza itjhaza eliketezako ngemva kwakhe.
“Kulungile,” kwatjho uTin ahleka. “Ngicabanga bonyana uNoodle ufuna ukuba yingcenye ye-We Can Band. Begodu ngicabanga bonyana ufuna nawe usijoyine,” watjho akhomba uBella.
UTin wasiza uBella ukukhwela esiteji bebatjhaphulula amabhlege enza itjhada abhode umzimba kaNoodle. UBella banoNoodle bakhamba bayokujama eduze kukaNeo, uHope noJosh.
UTin wabetha igatara yakhe kanye wathi, “UMBHINO AWUTHOME!”
Lokha uTin nakakhomba uNeo noHope, bebabetha iingubhu zabo. UTin yena bekabhina, “Inyawo lesincele emuva,” akhomba isiqubuthu.
“Inyawo lesincele emuva.” kubhina isiqubuthu.
Ukusuka lapho uTin wakhomba uJosh yena wakhuhluza iinkhuhluzi zakhe ngokukhambisana nebetho.
“Inyawo lesidla emuva,” kwabhina uTin.
“Inyawo lesidla emuva,” kwabhina isiqubuthu.
UTin wakhomba uBella. Irhemo lamabhlege lenza itjhada eliketeza kamnandi lokha uBella awabethanisa ngokuwajuguja. UNoodle wakhonkotha ngokuthaba.
Masinyana kwabe sele kumnyanya ngokuzeleko. UTin wabhina ingoma yakhe lokha uNeo, uHope, uJosh noBella badlala ngokukhambisana naye. NoNoodle wabe akhonkotha angaqedi ngokujoyina naye!
Abanye abavumi nabo babhina imibhino yeenarha zemakhabo. Isiqubuthu sakwakwazela sawahla nezandla. Balithanda kwamambala ihlelo leli!
“Uyabona-ke,” kwatjho uTin ku-We Can Band, “isiqhenyana esincani lesi sisindise ibhudango! Ngiyanithokoza nobane … noNoodle, umuntu woke uthabele umnyanya omnandi!”
