UNeo, uJosh noHope bebakwaGogo boke. Bebacoca begodu bahlekela naphezulu.
“Tjhiiii! kwatjho ugogo. “Angizwa bonyana bathini emrhatjhweni. Yizani, asilaleleni soke ihlelo lami engilithandako.”
Bathula boke balalela. Msinyazana bezwa umrhatjhi aphatha igama lephaga yabo.
“Baba-ke! Iphaga yethu idumile!” kwatjho uNeo.
“… noTiniso, owaziwa ngoTin, uzabe asithabisa ephageni le namhlanjesi ngemva kwamadina akhambisana ne-We Can Band. Abavumi abavela eZimbabwe, eNigeria neMalawi nabo bazabe bakhona. Woke umuntu wamukelekile ukujoyina umnyanya lo!” kwatjho umrhatjhi.
“Gogo,” kwatjho uNeo, “ukuzwile lokho?” batjho woke umuntu wamukelekile. Singaya nathi? Siyabawa?”
UGogo waqala uNeo begodu wamomotheka. “Nangabe uJosh banoHope bavumelekile ukukhamba, nawe ungakhamba,” watjho njalo. UJosh banoHope baphuma emnyango msinya njengombani ukuyokubawa imvumo yokuya emnyanyeni wephageni kubabelethi babo.
Lokha nababuyako bazokuthatha uNeo, uHope watjela uGogo bonyana uBella banonina nabo bayaya.
“Kulungile, ningakhamba. Nihlale ndawonye,” kwatjho uGogo.
Ephageni, uNeo wabona uBella banonina, noNoodle naye bekakhona! “Ngicabanga bonyana woke umuntu obuya edorobheni lekhethu ukhona la,” kwatjho uNeo. “Nabanye abantu esingabaziko.”
“Lalelani…” kwatjho uJosh. “Kunabantu abakhuluma isiFrentjhi?”
“Iye!” kwatjho uHope. “Begodu ngizwa ne- Chichewa nesiShona.”
UNeo wabamba isandla sikaHope. “Qala,” kwatjho yena. “UTin usesiteji! Kodwana iphi i-We Can Band?”
Ngaphambi kobana uHope aphendule, uTin wasikima wathatha umbhobho. Wathi, “Lotjhani!” “SENIKULUNGELE UKUTHOMA UMNYANYA LO?”
“Iye, iye! kwarhuwelela isiqubuthu.
UTin wathoma wabetha igatara yakhe. “Lingisani mina,” watjho njalo lokha nakathoma ukubhina. “Inyawo lesincele emuva.”