“Anginizwa kahle bo!” kwamemeza uTin. “Asithokoze ndawonye! Noma nifuna iWe Can Band ukuba izonisiza?”
“Yebo, bo!” kwamemeza izethameli.
UTin wabheka ngapha nangapha. “Iphi kanti ibhendi? Cha bo! Angibaboni ndawo. Awukho phela umcimbi ongenayo ibhendi. Ngizodinga usizo lapha. Ukusebenzisana kuphela okuzokwenza lo mcimbi uphumelele!” UTin washo emamatheka njengoba ebheke izethameli nje. “Okokuqala, ngizodinga abashayi zigubhu ababili.”
UNeo noHope baba ngabokuqala ukuphakamisa izandla zabo. Ngenkathi begibela esiteji uTin wabaholela emathinini ekho_ amane amakhulukazi ayenezivalo zepulastiki. Amathini ayehlotshiswe ngephepha elimibalabala egqamile nezinkinobho. Kwakukhona nezinti zokushaya izigubhu ezazibekelwe ukusetshenziswa uNeo noHope.
“Manje sesidinga ozodlala izixukuzo,” kwasho uTin.
“UJosh! Biza uJosh!” kwamemeza uNeo.
“Ukhona umuntu owuJosh lapha? Josh! Ukuphi we Josh? Akeze lapha esiteji,” kuhleka uTin.
UJosh waphakamisa isandla sakhe. Amadoda amabili aqukula isihlalo sakhe samasondo asibeka esiteji.
“Siyakwamukela, Josh,” kwasho uTin. “Ake uzame ukuxukuza lezi zixukuzo.”
UJosh waqala waxukuza esokuqala walandelisa ngesesibili. Zenza umsindo ongafani.
“Awuzwa-ke!” kusho uTin. “MANJE-KE …”
Kodwa engakaqedi ayefuna ukukusho, kwezwakala umsindo omkhulu wokukhenceza. Wonke umuntu waqalaza efuna ukubona ukuthi kwakuyini leyo.
Memfu uNoodle egijima enqamula isiteji, ehudula amathini ayeboshelwe ndawonye kunentambo emlandelayo.
“Okhencekhence!” kwamemeza uTin. “Bese ngicabanga ukuthi balahlekile.”
UBella waphuthuma esiteji. “Noodle!” embiza. UNoodle wagijima waya kuBella, amathini ekhenceza emva kwakhe.
“Akunankinga, myeke,” kwasho uTin ehleka. “Ngicabanga ukuthi uNoodle ufuna ukuba yingxenye yeWe Can Band. Futhi uma ngibheka nje sengathi nawe ufuna ukusijoyina,” kwasho uTin, ebhekise kuBella.
UTin wasiza uBella wamgibeza esiteji base bezama ukuqaqa okhencekhence bamathini ayesexabene ethandelene emzimbeni kaNoodle. Emva kwalokho uBella noNoodle basondela bema eduze kukaNeo, noHope noJosh.
UTin washaya isigingci sakhe wathi, “AWUSHEKE UMCULO!”
Njengoba uTin ekhomba uNeo noHope nje, baqala badlala izigubhu zabo. UTin wabe esecula, “Unyawo lwesokunxele emuva,” wabe esekhomba izethameli.
“Unyawo lwesokunxele emuva,” kucula izethameli.
Okulandelayo uTin wakhomba uJosh naye uJosh waxukuza izixukuzo zakhe elandela isigqi.
“Unyawo lwesokudla emuva,” kucula uTin.
“Unyawo lwesokudla emuva,” kucula izethameli.
UTin wakhomba uBella. Amathini akhala kamnandi njengoba uBella ewashwila ukuze ashayisane. UNoodle wezwakala ekhonkotha ngenjabulo enkulu.
Ngesikhashana nje umcimbi wawusuvutha bhe. UTin wacula amaculo akhe ngenkathi uNeo, noHope, noJosh noBella bedlala ezabo izinsimbi. NoNoodle wezwakala eselokhu ekhonkotha yonke indawo ukuze naye phela angasali ngaphandle!
Amanye amaciko nawo acula amaculo amazwe awo. Izethameli zazilokhu zichwaza zishaya nezandla. Zaziwuthokozela kakhulu umcimbi!
“Niyabona-ke,” kusho uTin etshela iWe Can Band, “bewuzoba yini nje lo mcimbi ngaphandle kwalaba abane! Ngenxa yenu nina nobane … ngingamkhohlwa kanjani kodwa uNoodle, wonke umuntu lapha ukuthokozele ukuba lapha!”
