Mme, Bella na Noodle vho gidima vha tsa nga bada vha swika nḓuni ya Gogo. Vho wana Gogo vhe tshiṱangani vha tshi khou vhudzulela muya tshanḓani tshavho.

“ Maloo! Ndo ḓifhisa tshanḓa nga bodo iḽa i fhisaho!” ho amba Gogo.

“Kha vha tshi dzhenise maḓini a rotholaho ndi kha ḓi ya u dzhia khithi ya thusoṱhanzi,” ho amba Mme, vha mbo ḓi bva vha humela nḓuni yavho vha tshi gidima – kwaa, kwaa, kwaa .

Hu sa athu fhela tshifhinga tshingafhani Mme vha vha vho no vhuya, vho hwala tshibogisi tshi tshena tshi re na tshifhambano tshitswuku kha tshivalo tshatsho. Vho ḓodza tshanḓa tsha Gogo mushonga u ngaho mapfura vha tshi pomba nga banditshi.

“Gogo, vha nga si bike nga tshanḓa tshi no khou vhavha,” ho amba Mme. “Vhone na muṱa wavho vha tea u ḓa vha ḽa tshilalelo na riṋe madekwana ano.” “Ndo livhuwa,” ho amba Gogo. “Ndi humbela uri ni dzhie bodo iyo ya ṋawa i ḓo ḓadzisa zwiḽiwa zwashu.”

Nga tshifhinga tsha tshilalelo, Gogo na muṱa wavho vha swika.

Hhm, hhm! – Uyo wo vha mungo we vha ita musi vha tshi pfa munukhelelo wa khari ya mme a Bella ya u ḓifhelela yo bikwaho nga bodo ya ṋawa dza Gogo. Noodle na yone ya ṋewa zwiṱukunyana nga tshidongo tshayo. Shenga, shenga! Yo ḽa ya ṋanzwa na tshidongo. Ya mbo mna, mna . Yo nwa maḓi oṱhe e a vha e tshidongoni!

“Ndo takalela uri no mpfa ndi tshi ṱavha mukosi,” ho amba Gogo vha tshi vhudza Bella.