“Agaa, batho ka moka!” gwa goeletša Tin. “A re ketekeng! Goba le nyaka We Can Band e le thuše?”
“Ee, ee!” gwa goeletša lešaba.
Tin o ile a lealea. “We Can Band e kae? Aowaowa, nkane ke sa ba bone. E ka se be moletlo wa katlego ntle le sehlopha sa mmino. Ke nyaka thušo. Toro ye e ka kgonagatšwa fela ke sehlopha!” Tin o ile a lebelela lešaba ka myemyelo. “Sa mathomo, ke tla go nyaka babethi ba meropa ba babedi.”
Neo le Hope e bile ba mathomo ba go emiša diatla. Ba rile ge ba namela sefala, Tin a ba iša dithining tša kofi tše nne tše dikgolo tša go ba le dikhurumelo tša polasetiki. Dithini di be di kgabišitšwe ka pampiri ya mebala ya go taga le dikonopi. Go be go na le dikotana tšeo Neo le Hope ba tla di dirišago go betha meropa.
“Bjale re hloka yo a ka letšago tšhela,” gwa realo Tin.
“Josh! Tšea Josh!” gwa realo Neo.
“Go na le Josh mo? Josh o kae? A a tle mo sefaleng,” gwa realo Tin a sega.
Josh o ile a emiša seatla. Banna ba babedi ba ile ba nametša setulo sa gagwe sa go thetha sefaleng.
“O amogetšwe, Josh,” gwa realo Tin. “Leka go letša ditšhela tše pedi tše.”
Josh o šikintše ya mathomo, a šikinya le ya bobedi. Tša dira medumo ya go fapana.
“O letša gabotse,” gwa realo Tin. “BJALE, DIRA …”
Efela o rile pele a ka fetša, gwa kwagala lešata le legolo le kwetenketša. Batho ka moka ba ile ba lealea go bona gore ke eng.
Noodle o ile a kitima a lebantše sefala a goga dithini tša go tlemaganywa ka lenti ka morago ga gagwe.
“Ditšhaeme!” gwa goeletša Tin. “Ke be ke nagana gore ke di timeditše.”
Bella o ile a kitima a lebantše sefala. “Noodle!” a goeletša. Noodle a kitimela Bella, dithini di kwetenketša ka lešata ka morago ga gagwe.
“Go lokile,” Tin a realo a sega. “Ke nagana gore Noodle o nyaka go ba karolo ya We Can Band. Gape ke nagana gore o nyaka gore le wena o be karolo ya rena,” a realo a šupa Bella.
Tin a thuša Bella go namela sefala gomme ba thušana go tlemolla ditšhaeme tša go dirwa ka dithini mmeleng wa Noodle. Bella le Noodle ba ya ba ema kgauswi le Neo, Hope le Josh.
Tin o ile a letša katara ya gagwe gannyane a re, “MMINO A O THOME!”
Tin a šupa Neo le Hope gomme ba betha meropa ya bona. Tin a opela, “Leoto la nngele morago,” gomme a šupa lešaba.
“Leoto la nngele morago,” gwa opela lešaba.
Morago Tin a šupa Josh gomme Josha šikinya ditšhela tša gagwe go sepelelana le morethetho.
“Leoto la go ja morago,” gwa opela Tin.
“Leoto la go ja morago,” gwa opela lešaba.
Tin a šupa Bella. Molokoloko wa dithini o ile wa dira modumo wo mobose ge Bella a di hwidinya di thulana. Noodle o ile a goba ka lethabo.
Ka nakwana moletlo wa thoma go kgahliša. Tin o opetše dikoša tša gagwe mola Neo, Hope, Josh le Bella ba letša diletšo. Gomme Noodle o be a fela a tsena gare ka go goba nako le nako!
Ka morago seopedi se sengwe le se sengwe sa opela koša ye tee ya naga ya gabo. Lešaba le be le phaphatha diatla ebile le reta. Ba be ba rata pontšho yeo!
“O a bona,” gwa realo Tin go We Can Band, “sehlopha se sennnyane se se bolokile toro ya rena! Ke a le leboga lena ba bane … le Noodle, batho ka moka ba ipshinne ka moletlo wo mobose!”
