Neo, Josh le Hope ka moka ba be ba le ntlong ya Koko. Ba be ba bolela ebile ba segela godimo.

“Ššššš!” gwa realo Koko. “Ga ke kgone go kwa seyalemoya. Homolang ka moka re theeletše lenaneo la ka la mmamoratwa.”

Bohle ba ile ba homola gomme ba theeletša. Gateetee ba kwa mogaši a bolela leina la phaka ya bona.

“Agaa! Phaka ya rena e a tsebega!” gwa realo Neo.

“… gomme Tiniso, yo a tsebjago gape ka la Tin, o tla ba le pontšho le We Can Band lehono mathapama. Diopedi tša go tšwa Zimbabwe, Nigeria le Malawi le tšona di tla be di diragatša. Batho ka moka ba laletšwa go tla moletlong!” gwa realo mogaši.

“Koko,” gwa realo Neo, “naa o kwele? Ba re ba laletša batho ka moka. Re kgopela go ya fao. Ka kgopelo hle, Koko!”

Koko o ile a lebelela Neo gomme a myemyela. “Ge Josh le Hope ba dumeletšwe go ya, gona le ka ya,” gwa realo Koko. Josh le Hope ba tšwele ka lebelo la legadima ba eya go kgopela batswadi ba bona tumelelo ya go ya moletlong wa phakeng.

Ba rile ge ba boa go tla go tšea Neo, Hope a botša Koko gore Bella le mmagwe le bona ba a ya moletlong.

“Go lokile, le ka sepela. Le se ke la kgaogana,” gwa realo Koko.

Kua phakeng, Neo o bone Bella le mmagwe. Noodle le yena o be a le gona! “Ke nagana gore batho ka moka ba toropo ya rena ba gona fa,” gwa realo Neo. “Le batho ba baswa ba gona.”

“Theeletša …” gwa realo Josh. “Go na le batho ba go bolela Sefora?”

“Ee!” gwa realo Hope. “Gape ke kwa ba bangwe ba bolela Chichewa le Seshona.”

Neo o ile a swara Hope ka letsogo. “Lebelela,” a realo, “Tin o sefaleng! Efela sehlopha sa We Can Band sona se kae?”

Pele Hope a ka araba, Tin o ile a ya maekrofounung. “Dumelang!” a realo. “NAA LE ITOKIŠEDITŠE GO THOMA MOLETLO WO?”

“Ee, ee!” gwa goeletša lešaba.

Tin o ile a thoma go bapala katara “Ntšhaleng morago,” a realo ge a thoma go opela. “Leoto la nngele morago.”