Neo, Josh naHope bebasendlini yaGogo bonkhe. Bebakhuluma futsi bahleka kakhulu.
“Shhhh!” kwasho Gogo. “ Angiva kutsi batsini emsakatweni. Wotani, sonkhe asilalele umbukiso lengiyitsandza kutendlula tonkhe.
Wonkhe wonkhe wabindza walalela. Masinyanenje beva umsakati asho ligama lephakhi yabo.
“Hawu! Ipaki yetfu idvumile!” kwasho Neo.
“… futsi Tiniso, lophindze atiwe ngekutsi nguTin, utawube enta umbukiso ephakhi ngalentsambama akanye nebhendi yemculo i-We can Band. Bosobuciko labavela eZimbabwe, eNigeria naseMalawi batawube bacula nabo. Wonkhe wonkhe wemukelekile kulelidzili! Kwasho lomsakati.
“Gogo,” kwasho Neo, “ukuvile loko? Batsite wonkhewonkhe wemukelekile. Singaya yini? Siyacela.”
Gogo wabuka Neo wabese uyamoyitela. “Uma ngabe Josh naHope bavumelekile kutsi bahambe, nawe-ke ungahamba,” kwasho yena. Josh naHope baphuma emnyango ngalokukhulu kushesha njengembane bayocela imvume kubatali babo yekutsi bahlanganyele kulelidzili lelisepaki.
Batsi nababuya balandze Neo, Hope watjela Gogo kutsi Belala namake wakhe nabo bayaya.
“Kulungile, hambani-ke. Ningahlukani, kwasho Gogo.
Lena ephakhi, Neo wabona Bella namake wakhe, futsi ngisho naNoodle beketile! “Ngicabanga kutsi wonkhewonkhe welidolobha letfu ulapha,” kwasho Neo. “Nalabanye bantfu labasha futsi.”
“Lalela …” kwasho Josh. “Kukhona labanye bantfu labakhuluma Sifulentji?”
“Yebo!” kwasho Hope. “Futsi Sitjetjewa (Chichewa) neSishona.”
Neo wahlwitsa umkhono waHope. “Buka,” kwasho yena, “Tin usesiteji! Kepha liphi lelicembu le-We can Band?”
Ngembikwekutsi Hope aphendvule, Tin wasukuma waya embhobheni. “Sanibonani!” kwasho yena. “SENILUNGELE YINI KUCALA LELIDZILI?”
“Yebo, yebo!” kwamemeta sicuku.
Tin wacala wadlala lugatali lwakhe. “Phindzani emvakwami,” kwasho yena ngesikhatsi acala kuhlabela. “Lunyawo lwesencele emuva.”