“Nnḓariyeni, roṱhe!” hu vhidzelela Tin. “Kha ri pembele! Kana ni khou ṱoḓa We Can Band vha tshi ni thusa?”
“Ee, zwo ralo!” hu huwelela gogo ḽa vhathu.
Tin a lavhelesa he a ima hone. “Ingafhi bennde? Hai nandi, a thi vha vhoni. A hu na ḓikiṱa hu si na bennde. Ndi ḓo ṱoḓa u thusiwa. Ndi tshigwada fhedzi tshine tshi nga tsireledza muloro uyu!” Tin a mwemwela musi a tshi lavhelesa gogo ḽa vhathu. “Tsha u thoma, ndi ḓo ṱoḓa vhalidzi vha mirumba vhavhili.”
Neo na Hope ndi vhone vho thomaho u imisa zwanḓa. Zwenezwi vha tshi khou gonya luvhanḓeni, Tin a vha isa hu re na magokoko maṋa mahulwane a gofhi a re na zwitibo zwa puḽasiṱiki. Magokoko o vha o khavhiswa nga mabammbiri na gunubu zwa mivhalavhala i penyaho. Ho vha hu na zwitanda zwa u lidza mirumba zwa Neo na Hope zwine vha ḓo zwi shumisa.
“Zwino ri khou ṱoḓa mulidzatshele,” hu amba Tin.
“Josh! dzhiani Josh!” hu huwelela Neo.
“Hu na Josh afha vhathuni? U ngafhi Josh? Kha ḓe ngeno,” Tin a sea.
Josh a imisa tshanḓa tshawe. Vhanna vhavhili vha takulela tshidulo tsha u tshimbidza vhaholefhali tshawe luvhanḓeni.
“No ṱanganedzwa, Josh,” hu amba Tin. “Lingedzani tshele idzi mbili.”
Josh a thoma nga nthihi a kona u ḓa iṅwe. Dzo ita mibvumo yo fhambanaho.
“Zwo naka,” hu amba Tin. “ZWINO, KHA RI …”
Fhedzi a sa athu na u fhedza, ho pfala mubvumo mudenya u ḓifhaho. Muṅwe na muṅwe a sedzasedza hoṱhe u vhona uri hu nga vha hu mini.
Zwenezwo Noodle ya gonya luvhanḓeni, i tshi khou kokodza zwikoṱikoṱi zwo vhofhekanywa nga muḓali murahu hayo.
“Mifhululu!” hu huwelela Tin. “Ndo pfa unga ndo zwi xedza.”
Bella a gidimela thungo ya luvhanḓeni. “Noodle!” a vhidzelela. Noodle ya gidimela kha Bella, zwikoṱikoṱi nazwone zwi kati nga phosho murahu hayo.
“Zwo luga,” hu amba Tin a tshi sea. “Ndi humbula uri Noodle i khou ṱoḓa u vha muraḓo wa We Can Band. Nahone ndi humbula uri i khou ṱoḓa na inwi ni tshi ri dzhoina,” u ralo, a tshi sumba Bella.
Tin a thusa Bella u gonya luvhanḓeni nahone vhoṱhe vha thusana u vhofholola zwikoṱikoṱi u mona na muvhili wa Noodle. Zwenezwo Bella na Noodle vha ya vha ima tsini ha Neo, Hope na Josh.
Tin a lidza kaṱara yawe nga iḽa nḓila ya u tou nga o swiela gunwe ḽawe kha marale ayo a ri, “MUZIKA KHA U THOME!”
Musi Tin a tshi sumba kha Neo na Hope, vha lidza mirumba. Zwenezwo Tin a imba, “Mulenzhe wa monde murahu,” a sumba khudzaifpi kha gogo ḽa vhathu.
“Mulenzhe wa monde murahu,” hu imba gogo ḽa vhathu.
U bva afho Tin a sumba kha Josh na ene a lidza tshele dzawe zwi tshi tshimbilelana na mutevhetsindo.
“Mulenzhe wa tshauḽa murahu,” hu imba Tin.
“Mulenzhe wa tshauḽa murahu,” hu imba gogo ḽa vhathu.
Tin a sumba kha Bella. Zwikoṱikoṱi zwo vhofhekanywaho zwa lila nga nḓila i takadzaho zwenezwi Bella a tshi khou ita uri zwi rwane. Noodle ya huvha nga dakalo.
Hu si kale ḓikiṱa ḽa vha ḽo ṱanganedzana. Tin a imba nyimbo dzawe ngeno Neo, Hope, Josh na Bella na vhone vha tshi khou tevhedzelavho. Noodle na yone yo huvha fhano na fhaḽa hu u shelavho mulenzhe!
Zwenezwo muṅwe na muṅwe wa vhaṅwe vhaimbi a imba luimbo u bva shangoni ḽa hawe. Gogo ḽa vhathu ḽa pembela na u vhanda zwanḓa. Vhathu vha takalela ṱano!
“Ni khou vhona,” hu amba Tin a tshi amba na We Can Band, “tshigwada itshi tshiṱuku tsho tsireledza muloro! Ri livhuha vheiwe vhana … na Noodle, muṅwe na muṅwe o ḓifhelwa nga ḓikiṱa iḽi!”
