Neo, Josh na Hope vho vha vhe nḓuni ya Makhulu avho. Vho vha vha tshi khou ita phosho nga u amba na u sea.

“Shhhh!” hu amba Makhulu. “A thi tsha pfa na zwine zwa khou ambiwa radioni. Iḓani, kha ri thetshelese roṱhe mbekanyamushumo ine nda i funesa.”

Muṅwe na muṅwe a fhumula a thetshelesa. Hu si kale vha pfa muhashi a tshi amba nga dzina ḽa phakha yavho.

“Evho! Phakha yashu i a ḓivhea!” hu amba Neo.

“… nahone Tiniso, ane a ḓivhea hafhu nga ḽa Tin, u ḓo vha a khou hasha e phakhani masiari a ṋamusi e na tshigwada We Can Band. Vhaimbi vha bvaho Zimbabwe, Nigeria na Malawi na vhone vha ḓo lidza. Muṅwe na muṅwe o ṱanganedzwa u dzhenela ḓikiṱa iḽi!” hu amba muhashi.

“Makhulu,” hu amba Neo, “vho zwi pfa? Hu pfi muṅwe na muṅwe o ṱanganedzwa. Ri nga ya? Ri khou tou humbela?”

Makhulu vha lavhelesa Neo vha mwemwela. “Arali Josh na Hope vho tendelwa u ya, na inwivho ni ḓo ya,” vha ralo. Josh na Hope vha mbo bva nga luvhilo lwa nḓadzi u ya u humbela thendelo kha vhabebi vhavho ya u dzhenela ḓikiṱa ngei phakhani.

Musi vha tshi vhuya u ḓa u dzhia Neo, Hope o vhudza Makhulu uri Bella na mme awe na vhone vha khou ya.

“Zwo luga, ni nga ṱuwa zwaṋu. Ni dzule noṱhe fhethu huthihi,” hu amba Makhulu.

Phakhani, Neo a vhona Bella na mme awe, na Noodle na yone yo vha yo ḓa! “Ndi humbula uri muṅwe na muṅwe u bva ḓoroboni yashu u fhano,” hu amba Neo. “Na vhaṅwe vhathu ri sa vha ḓivhi.”

“Thetshelesani …” hu amba Josh. “Hu na vhane vha khou amba Tshifura?”

“Ee!” hu amba Hope. “Ndi khou pfa na Chichewa na Tshishona hafhu.”

Neo a fara tshanḓa tsha Hope. “Lavhelesani,” u ralo, “Tin u luvhanḓeni! Hone vha ngafhi vha We Can Band?”

Hope a sa athu na u fhindula, Tin a mbo sendela tsini na khudzaipfi . “Hurini!” u ralo. “NO ḒIIMISELA U THOMA ḒIKIṰA IḼI?”

“Ee, zwo ralo!” gogo ḽa vhathu ḽa vhidzelela.

Tin a thoma u lidza kaṱara yawe. “Ni dovholole nga murahu hanga,” u ralo a tshi khou thoma u imba. “Mulenzhe wa monde murahu.”