URhino ugcina ethenge i-necklace yegolide enamadayimane, kanye ne-bracelet.
“Hhayi le ngane inenhlahla, Rhino. Inkinga nje ukuthi yona ayazi. Isipho esibiza u-R12 000!” kubabaza uBhubesi.
“Uyabona, Bhubesi, ngelinye ilanga ngizoqopha umlando ngoMaryJ.”
“Ubhasobhe ungawuqophi esibhedlela ngoba ukubeke kwacaca ukuthi akasiye uMaryJ. Uzophinde umbize kanjalo akulahle phansi ngenqindi. Manje uzomnika nini uMary isipho sakhe?”
“Kusasa ekuseni. Ngizolala eflethini namuhla. Kusasa ngizovuka ngimnike.”
“Sikufisela inhlanhla, mjita. Ngiyazi uzoyidinga!” kusho uBhubesi.
“Into engiyibona kuwe, Bhubesi, ukuthi awunaso isisoka. Uqonywa ngemali. Thina sakhulela emakhaya. Ngeke ngihlulwe ingane mina.”
URhino uthenga izimbali kwesinye isitolo, bayishaye izule imoto bebheke endlini.
Bafika eArboretum, uRhino aqonde kubo kwaRachel, acindezele i-bell esangweni. Noma bengahlobene noRachel lentombazane ibabiza ngomalume ngoba ibahlonipha. Kuphendule yena uRachel.
“Hi, ngingakusiza?”
“Ngidinga usizo lwakho, mshana,” kusho uRhino.
Kumbhuleka ikhethini, alunguze uRachel. Aphume endlini.
“Sawubona, Uncle R?” kusho lentokazi ifika esangweni.
“Unjani, Rachel?”
“Ngiyaphila. Waze wayidla indwangu, Malume! Beziphenduka nawe izingane lapho uqhamuka khona”
“Usho kanje, mshana?” uRhino ezibuka.
“Ufuna usizo olunjani, Uncle R?”
“Uyamazi uMaryJane?”
“Hha, ngu-classmate wami uMary. Umazelaphi uMary?”
“Akubalulekile lokho. Awusho, unayo i-boyfriend?”
“Hell No! UMary akanandoda. Ingane yasemakhaya leyana. Uyamfuna?” Isho ize itshikize le enguRachel. Ziphapheme izingane zalapha emadolobheni.
“Sengathi imbuzo yakho miningi kakhulu, mshana!”
“Angithi udinga usizo lwami?”
“Ja, khona kunjalo.”
“Ngivumele ngikusize, kodwa umdala malume kuMary. Hahaha!”
Ahleke noRhino.
“Lalela, manje ngifuna ukuxoxa naye namhlanje lo mntwana. Ngimbonile eya esikoleni. Ungakwazi ukusixhumanisa? Inkinga ukuthi ngizamile ukuxoxa naye kodwa…”
“I know, ngimazi kahle uMaryJane. Akabhedelwa. Enjalo nje uyaphoxana, kodwa ngimjwayele. Ngizokwenza i-plan.”
“Iyiphi leyoplan oyicabangayo?”
“Ngizocela inombolo kaLondi, umngani wakhe, kwabanye abafundi. ULondi, yena-ke uphapheme. Nginesiqiniseko sokuthi angakusiza.”
“Sengithembe wena, mshana. Ithumele njengamanje i-message, ihlangane lento. Unayo i-airtime?”
“Ja! Ungithatha kancane, Malume. I-airtime ibuzwa kimi. Imina enginganika wena i-airtime!”
Ahleke noRhino. Alinde ngesikhathi uRachel ethumela umlayezo. Alinde isikhashana. Kubuye impendulo enenamba kaLondi.
Kuthi akandize uRhino.
“Bamba la mshana! Mshana ngena la!”
“Sho malume”
Bashayisa izibhakela.
“Moja mshana! Uma ihambe kahle le deal, uzobona ukuthi ngizokwenzelani”
Bahlukane noRachel, uRhino uhamba ebhampa ayongena endlini. Uthathe izinto ezimbalwa, azifake esikhwameni. Akathi vu kubangani bakhe. Nabo bayambuka, badlala amakhadi.
“Manje?” kubuza uNdlovu eneka izandla.
“Manje ini?” kuphendula uRhino.
“Zikhiphani? Wabuya usupakisha?”
“Ngichazile nje ukuthi ngizolala eflethini namhlanje.”
“Hhayi bo! bengithi uyadlala. Angeke ilinde le ndaba kaMary?”
“Ngoba?”
“Usukhohliwe ukuthi kumele kushaye u-8 ebusuku siseMlazi? Kumele siqede ngalento ukuze sizokwazi ukukhokha umoya.”
“Eish!” uRhino uyazikhalela.
“Cabanga kahle ndoda. Akumele igqabule lentwana. Le kaMary ungabuye uyibone.” Kusho uBhubesi.
“Ngeke kulunge, Bhubesi, namhlanje kumele ngibonane noMary kumnyama kubomvu. Hambani ntwana, nizoyenza lento. Ngiyanithemba.” Kusho uRhino ephuma evala isicabha.
Uma ngaphandle isikhathi eside ecabanga. Konje kumele baye eMlazi? Kungaba njani uma engathatha uMary abaleke naye? Kudala enethwa izimvula, le ndaba kaMary amanzi amancane.
***
Uthini umbono wakho: Muntu wesilisa, ungayilandela intombazane njengoba kwenza uRhino? Muntu wesifazane, ungenzenjani uma umuntu wesilisa ekulandela ngale ndlela?