Tšatšing la go latela o ile a thoma go leletša nomoro yela. Moyagabo o rile a sa re ke tla kwa go araba mosadi, wa araba monna gomme a napa a kgaola mogala ka pela. Monagano wa gagwe o be o mmotša gore e swerwe ke monna wa kgarebe yeo.
Ka le le latelago a letša gape gomme ya no arabja ke monna yola. Moyagabo a re, “ke kgopela tshwarelo. Ke leleditše mogala o fošagetšego.”
“O mang?” Monna o ile a botšiša.
Moyagabo o ile a kgaola mogala ka bjako eupša monna yoo a thoma go mo leletša kgafetša kgafetša. Mafelelong a be a o araba.
“Ke ratile lentšwana la gago. Ke nyaka o be kgarebe ya ka. Nna ga ka nyala. Wena?” Monna yola a realo.
Moyagabo o ile a kgaola mogala a tšhogile ebile a thuthumela. O be a tomotše le mahlwana eke legotlo le le ka moleteng.
Ka le le latelago ya re bošego mola ba sa bogetše thelebišene, monna yola a letša gape. Moyagabo a se arabe.
“Araba mogala woo,” Marumo a mo laela.
“Ke wrong number,” a fetola ka letšhogo.
Marumo o ile a thoma go belaela.
“Gabotsebotse ke mang yo a letšetšago mosadi wa ka bošego bjo?” O ile a ipotšiša.
Ba ile ba tsena malaong ba robala. Marumo yena o be a hlobaela, boroko bo gana.
“E re ke utswe mogala wo wa mosadi yo ke bone gore ke mang yo a mo letšetšago.”
Marumo o ile a tsoga gomme a tšea sellathekeng sa Moyagabo. O ile a tsena ka ntlwaneng, a thoma go se lekola. Ge a re tlaa! a gahlanetšwa ke dinomoro tša mogwera wa gagwe wa go wa le go tsoga. A thoma go ja marapo a hlogo.
“Go ra gore moisa yo ke kgale a nja direthe, mos. Yena le mosadi yo ba ntira setlaela.”
Bošego bjoo Marumo o ile a palelwa ke go bo pata. O be a fegelelwa, mahlo a tletše meokgo.
E rile ge letšatši le šala le ntšha nko, ya ba Marumo o šetše a feditše go phuthela mosadi wa gagwe dipeke. A mo topa ka letsogo gomme a mo gogela ka sefatanageng.
Mosadi o rile ge a botšiša gore kganthe o sentše eng, Morumo a se mo arabe. O ile a tswalela lebati la sefatanaga gomme a gata lekhura mošemane, mahlo a tuka mollo. Ya ba gona Moyagabo a boetše gagabo.
Re botše: Naa o ithutile eng ka kanegelokopana ye?