Moyagabo e be e le ngwanenyana yoo a goletšego lapeng la hlompho ebile a na le dihlong. Ge a gola o be a fela a rapela gore ka le lengwe la matšatši a hwetše monna yo a swanago le yena, wa go ba le dihlong. Thapelo tša gagwe tša arabiwa. E rile ge a šetše a godile a kopana le mohlankana tsoko yoo ba rego ke Marumo.

“Buti, ke a go swantšha.”
“O mang? Nna ga ke go tsebe. Ke eng? O nyaka go ntseba?”
Moyagabo ka dihlong a inamiša sefahlego gomme a re, “Aowa,” a segasega.
Marumo o ile a thoma go itsebiša.
“Nna ke Marumo… wena o mang?”
“Ke nna Moyagabo,” a realo a inametše fase.
Go tloga fao, Marumo le Moyagabo ba ile ba fetša ba kwane. Marumo o be a šomela go la Gauteng a boa gae mafelelong a kgwedi fela. O be a fihla gae ka Labohlano. Mokibelo wa gona o be a tla tšea Moyagabo gomme ba ya go ja dijo tša matena, a fetše ka go mo iša paeskopong.

E rile ge Marumo a bona gore Moyagabo o utswitše pelo ya gagwe, a ya go batswadi ba gagwe a ba botša gore o hweditše lekgarebe gomme o nyaka go le nyala.

Batswadi ba Marumo ba ile ba roma bomalomeagwe le borangwaneagwe, gore ba ye go ntšha magadi gabo ngwanyana.

Bobedi Marumo le Moyagabo ba ile ba ipshina ka lenyalo la bona. Morago Marumo o ile a reka ntlo Gauteng gomme ba hudugela moo. Batswadi ba Moyagabo le bona ba be ba thabile kudu ge ba ekwa gore mokgonyana wa bona o reketše ngwana wa bona ntlo. Go be go rena šebešebe gohle.

Morago ga ngwaga, ba ile ba šegofatšwa ka ngwana wa mošemane. E rile ge ngwaga wa go latela o thoma. Marumo dilo tša mo tlaba mošomong. Ba be ba re a theogele ka iri ya boselela gomme a tšhaiše ka iri yona yeo mathapama.

“Bjale ke tlo bona ba lapa la ka neng, hle banna? Ke tšwa ka maswiswi ke boa ka maswiswi,” o be a phela a balabala.

Re botše: Naa o nagana gore se e tla ba bothata lenyalong la bona goba Marumo o no tshwenyega ka lefela?