UMirriam naye uhlushwa amaphupho amabi kaMbhuleni kulamasonto amabili uSphelele enyamalele. Amaphoyisa afika njalo ezobheka uSphelele. Usola nokuthi uzibulele umfana wakhe. Uyakhululeka uma ebona uSphelele ethushuka engena ngesicabha.

“Uphumaphi, Sphelele? Uyaphila empilweni, mntanami? Nakhu bekuqambela amanga bethi wena wabulala uMhlengi. Awuzange umbulale, angithi?” uMirriam akalindi nokuthi ahlale phansi uMhlengi.

USphelele uyiziba yonke lemibuzo.

“Mama, ngikhiphe umphefumulo kamfowethu ngenxa yakho,” kusho uSphelele ekhulumela phansi.

Ukhamisile uMirriam, umangele akazi uzophendula athini.

“Mama, wenziwa yini wafuna indoda yomuntu?” kuqhubeka uSphelele. “Wawusukwe yini?”

“Ngeke ngiphendulane nengane esanganayo mina,” intukuthelo iyabila kuMirriam. “Ungangihlanyeli wena, Sphelele.”

“Ngizifake enkingeni ngenxa yenzondo yakho, Mama. Umfazi kaMbhuleni akaze akwenze lutho. Uwena obumudelela, umuhlukumeza umphefumulo, kwathi uma eshona ubaba wamubuyisela kuMaNtombela esehamba ngebhokisi.”

UMirriam usebheke phansi manje, uchiphiza izinyembezi. Akanazwelo uSphelele, azisho lutho izinyembezi zikamama wakhe kuye.

“Kwakhona ukuthi ungafuni ngizwane noMhlengi bekuyikho ukuqhuba ukukhohlakala kwakho. Ungene nasemshadweni wami wawuxova,” adonse umoya uSphelele, anikine ikhanda. “Ngibe isilima ngokuthemba wena ngakuvumela ungone yonke leminyaka.”

Uyalila uMirriam uma ezwa amazwi omntanakhe amephula inhliziyo.

Umshiya kanjalo uSphelele, angene emotweni. Uyishaya izule, ubheke kaMhlengi. Ufika esangweni alinde isikhathi eside esaba ukungena. Agcine ezidelile, angene. Ungqongqoza esicabheni. Kuba ukuvula isicabha, ahayize uMaNtombela.

“Mama, ngiyaxolisa! Ngiyaxolisa, Mama, ngokuthatha impilo yengane yakho. Ngiyaxolisa ngokuthatha impilo yomfowethu. Ngiyaxolisa ngokuphula inhliziyo yakho. Ngiyaxolisa! Ngicela ungixolele,” uSphelele umemeza kunanele indlu. Uguqile phambi kukaMaNtombela.

Athule uMaNtombela isikhashana ebuka uSphelele ekhihla isililo, ezisola phambi kwakhe.

“Kulungile, Sphelele, ngiyakuxolela,” uMaNtombela usula izinyembezi. “Kodwa noma ngikuxolela mina uyazi nawe ukuthi kumele uyokhokhela izono zakho.”

“Mama, ngiyazi. Ngizimisele ukuthi uma ngisuka lapha ngizozinikela emaphoyiseni. Nginesicelo esisodwa ngaphambi kokuthi ngikwenze lokho.”

Amangale uMaNtombela.

“Mama, ngicela ungikhombise lapho uMhlengi elele khona. Ngifuna ukuyoxolisa nakuye yize engeke esakwazi ukungiphendula,” kusho uSphelele.

“Kulungile,” kusho uMaNtombela.

Lidonsa unyaka nezinyanga eziyisithupha icala likaSphelele. UMirriam kwakuthi akafe ngosuku lwesigwebo ngoba uSphelele wathola udilikajele. Uhlangana noMaNtombela sekuphunywa enkantolo.

“Usuyajabula ke manje?” kubuza uMirriam eqondise kuMaNtombela. “Uyajabula njengoba sekwenzekile lokhu okufunayo?”

“Cha lokhu engikufunayo akukenzeki, ima kusazokwenzeka,” kuphendula uMaNtombela. “Kusukela namhlanje uzokuzwa ubuhlungu benhliziyo ozosala nabo ngoba uzolahlekelwa ingane yakho iphila. Izophela kancane kancane iphelela ejele.”

Uyazisola uMirriam, kuhlengezela izinyembezi.