Shango heḽi ḽi ela mukhaha na notshi
Lunako lwaḽo lu fhira lwa musidzana Thamara
Mavu aḽo o nona a nga a tsimuni ya Edeni
Vhaḽa vhathu vho dina nga u ḽa uḽa muri.
Ngavhe ri sa fi,
Ho dina lufu.

Vhutshilo hashu vhu vho nga ha thunzi,
Ri rwiwa nga nḓadzi dza vhutshilo ra pepeleka
Ri fhefherwa ra gaiwa sa mavhele
Musi u tshila zwi si tshe na vhungoho
Ndi ri ngavhe lufu ri tshi tou nanga
Ndi musi Mandela a tshe hone fhano.

Na vhavhuya hupfi vha a lovha
Marambo avho a ḽiwa nga zwivhungu
Shango ḽa lila tshiṱodzimare
Ntswu ra fuka ra vhuya ra nzwinzwimala nadzo.
Ndi ri ngavhe lufu ri tshi tou nanga,
Rolihlahla o vha a tshi ḓo tshila u swikela.

Ngavhe lufu ri tshi kona u ḓilamulela
Khombo ra kona u ḓipilela
Dwadze-tshifu ra kona u ḓitinyela
Milingo mivhi ra kona u ḓiponyokisa
Ndi ri ngavhe lufu ri tshi tou nanga
Ndi musi shango ḽo ḓala vhakhethwa na vhavhuya.