Kgolegong, Mazet o be a sa ile le menagano, mola lephodisa la kgopana le lebile go yena le swere maphephe. O be a sa nagana ka toro ye mpe ya go tšhoša yeo a e lorilego ka nna. Torong yeo ke be ke mo swere ka kgokgokgo ebile a ekwa le sello sa lesea.

“Monna, ga re hwetše bohlatse bja maleba bjoo bo go lebanyago le molato wa polao yeo o pharwago ka yona … seo se ra gore ga o na molato.” La realo lephodisa leo le bego le swere molato wa gagwe.

Mazet ge a le tseleng ya go ya gae o ile a thulwa ke sefatanaga. O be a itlhaganetše kudu a nyaka go ipona a le ka gae. Koloi e mo robile maoto. Batho ba thušo ya pele ba ile ba mo iša bookelong.

Nomsa o rile a sa selaganya bookelong a tlo ntsošetša, a bona Mazet. A makala kudu gore mmolai wa tatagwe gobaneng a tšwile kgolegong. Letšhogo leo a bego a le tšhogile ke tšhaba go le hlaloša gobane le matolo a gagwe a be a kwetlakwetla.

“Ngwana mma, ke re Mazet o tšwile kgolegong,” Nomsa a realo.

Sebakeng sa gore ke makale ka mokgwa wo Nomsa a bego a letetše, o ile wa se be bjalo. Ke ile ka mo lebelela ka mahlong ka tšholla meokgo.

“Mmitše a tle a phološe selo se sa gagwe,” ka realo.

“O a ikwa gore o reng goba o lahlegelwa ke kgopolo?” Nomsa a botšiša a kgohlotše le mahlo.

“O ile a mphaya theto ka kgang,” ke ile ka phula lešata la sello gomme baoki ba tla ka potlako.

Nnete ya re go tšwelela, ba tšea madi a Mazet gomme ba phološa lesea. Maphodisa a ile a mo swarela molato wa go kata. Mazet le yena a phula sephiri a re ke nna ke bolailego tate mola ke nyaka go bolaya yena.

Ke mo ke ilego ka swarelwa molato wa polao e se ka maikemišetšo.