Ke be ke sa nyake ebile ke tšhaba go kopana le motho ka nama ya ka. Sefahlego sa ka se boifa go batamelwa ke motho.
Ke  be ke inyaka ke le tee le pelo ya ka yeo e bego e tsorotla madi. Meokgo yona e be e keleketla boka noka ya Tubatse e tšhollela ka Lepelle.
”Ruri ke nnete gore monna yola lapa la gešo le mo tshepilego kudu … Yena yola wa mohlomphegi, o mphaile theto ka kgang?”
Yeo e be e le nnete yeo e bego e diragaletšego nna khutswanyana ya ka lapeng la go topa tša fase mola tikologong ya Gomora, ngwana wa dikoti marameng, Boledi.
“Pelo ya ka e tla no tsorotla madi mola meokgo e tla elela go fihla fase ga dinaong. Ke tla botša mang taba ye ya go pšheša mare?”
Ka phapošing e be e le lefelo leo ke tšhollelago dikeledi ebile ke ikahlola, ke ithoga ebile ke ke nyefola.
”Nkabe ke se ye moletlong, eupša bomma ba rile ke ba thibele legato ka ge bona ba sena maoto a go ya meketeng gobane ba tšofetše. Nkabe ke gane go nwa seno sela buti Mazet a mphilego gobane ke rile go se nwa ka swarwa ke boroko gomme ge ke tsoga ka ikhwetša bolaong le yena.”
Go itshola ga go thuše gobane ge meetse a faletše le ge o ka lomantšha meno o ka se a olele.
“Ke sephiri sa ka, ke ya moletemohlaelathupa le sona.”
“Koo, kooo!”
Lebating gwa kwala motho. Ke ile ka dio homola gobane sefahlego sa ka se be se rurugile ka baka la go lla. Bjalo ke mang yena yeo a tla bego a  ntshekiša gore ke kgopišitšwe ke eng? Ke ile ka ipotšiša bana bešo.
“Boledi! Boledi! Mpulele hle wena! Kgane o fihlile lesogana ka moo kamoreng ya gago na?” a realo sesi wa ka yo a nthatago Nomsa.
O phela a tshwenyega ka nna ke a mo tseba, eupša lehono o ntsheleka boka khwephane.
“Boledi wee!” O goeletša ka lentšu le legolo mo a ilego a ba a pharamola lebati a tsena ka gare.
“Ao my baby, kgane ke eng?” a ntebelela ka mahlong empa ka mo fa magetla.
“Sister! Sister! Gobaneng o ntshwara eke ngwana gabotse?”
“Love, o tla no dula o le ngwana go nna babes. Ke a tshwenyega ka wena.” A re go realo a ntekola sefahlego.
“Hey girl, o be o lla?”
“Nop”
“Mpotše nnete ngwanana. Gape ga ke sefofu.”
“Ke opša ke hlogo fela. E tla ba right. O se ke wa tshwenyega ka nna.”
Meokgo yona e be e no benya ka mahlong a ka ka ge bohloko bjona bo sa hlaba pelo ya ka .
“Ge e le gore o a rereša, hlogo yeo e tlo go bolaya. Ga re ye bookelong.”
“No … sister Nomsa. Ke tla ba sharp. Ke nyaka fela go robala ke ikhutše.”
O rile go sepela ka dula mpeteng wa ka, ka sekhumola sello sa masetlapelo. Hlogo ya ka e be eke e ka pharoga. Bošego le mosegare boroko ga bo gona.
Ge ke le ka mo gae mosegare ke ile ka selekega pelo, le dibete tša feroga ge ke bona buti Mazet a hwile ka sesego le motswadi wa ka mola ba enwa digalagala.
Ke tla no thoma kae ka monna yoo wa tšitširipa ge ke bolela ka sephiri sa gagwe. Monna wa pelo ya bosathane.
“Kgarebe ya ka, tlela daddy dikuku, o swerwe ke tlala” papa a realo.
Tate wa ka ke monna wa sekgapho gomme ke tseba gabotse gore ge nka se dire seo a se nyakago, ke tla itšhatšharela. 
Ke ile ka tsena ka moraleng.
“Modimo a ntshwarele le nna” ka realo ke tšhela sehlare sa go bolaya magotlo ka dijong tša Mazet. Ke tsere tsa tate ka yo mo fa pele. Ka fetša ka tšela tša mpholo ka di fa buti Mazet. Ke be ke nagana gore ge Mazet a se gona mo lefaseng, moya wa ka o tla phela bokaone.
“Ke a leboga morwedi wa ka.”
“Go leboga nna, papa”
Ke ile ka fulara ka tsena ka ngwakong. Letswalo la ka le ile la kibakiba ge ke bona Mazet a sa je dijo tšela ke mo filego eupša go eja wa ka motswadi.
Mazet o be a sa je gobane ke lebetše go mo tšhela phori mahlong ka go segasega gore a se ke a nnaganela bobe. O swanetše goba a mpone boka lenaba la gagwe.
Ke ile ka thoma go tšhoga ge tate a mpitša.
“Boledi, ntlele le dikuku tše dingwe. Gape di bose kudu.”