Nembeth’ izikhumba zezimvu
Anilungile nina ningamagovu
Nizenz’ abazwelana nabantu
Nisizakala ngamanxeba abantu
Ninamanga amnandi kanti ayingozi
Okwesoka leshel’ intombi
Nisithembis’ izulu nomhlaba
‘Ma nisafun’ isikhundla niyalunga
Nasithola niyakhohlw’ emuva
Kwabaveza amaqiniso niyababulala
Kwaba melana nani niyabasongela
Nithi nenza imisebenzi kaNkulunkulu
Ngegama likaJesu, egameni likaJesu!
Nithi kubant’ abanikele kakhulu
Kwabanganikeli nithi ngeke balibon’ izulu
Ungafung’ ukuthi nipheth’ izihluthulelo zulu
Zimpis’ eziphangayo niyadlala ngabantu
Nigqoka niconse ngamasudu anokusho
Kanti afihl’ unjalo benu zikhohlakali
Ngokwenu nithi nihlakaniphe niqedile
Akukho liqili lazikhoth’ umhlane
Amacal’ enibekwa wona ayasabeka
Aniveza lokho eniyikho anipheny’ izinqe
Ninamandl’ onke niba ngophunyuka bemphethe
Niyaligcobha nje etilongweni ningena niphume
Nibuye nidlale ngabantu nabo banimele baneseke
Yeyi ngoba nina niyakwazi ukwenza
Alukho uzwela aninalo nakancane
Senibhuqana nibizana ngamaqabane
Abanye benu babizana ngabazalwane
Nibizana ngogogo nomkhulu nangogobela
Yeka nini bo senitshiyoza senibhonga
Nithi ngibalaphi bendabulo izifo ziyanehlula
Nithi ninamandl’ okuphilisa kanti owokubulala
Owokuphilisa aniwazi kodwa niyawaz’ owokubulala
Niyiqedile imindeni niyidunga niyeqatha
Nina nibaqedil’ omakhelwane nibaxabanisa
Zimpis’ eziphangayo zint’ ezidl’ imbumbe
Imikhub’ engcolile eniyenzel’ ebumnyameni
Kwanina phakathi kwenu anethembani
Nidayisana nodwa nibulala nodwa
Nibanga iphepha elinesphambano
Lapho seniphika nifung’ isiphambano
Nizenze msulw’ okwezingelosi
Kanti nizimpis’ eziphangayo eziyingozi
Mhlawumbe koniqoq’ ukuhlwa nani
Umhlaba lo akuwona owenu
Lo mhlaba lo unomnikazi wawo
Nidlalile ngezimvu zedlelo lakhe
Nizidephunela noma iyiphi enonile
Aninandaba nanoma iyiphi ezacile
Izimvu azihlenga ngegazi leNdodana yakhe
Ngeke nidle izimvu zakhe kugcwebe iziziba
Liyonishonela nani ilanga
ibhalwe ngu:
Sthembiso Sydney Msezane.