Kufa uyinto engekho,
Ubonakala ukhona kodwana awukho.
Uzibona uyikutani,
Kodwana ulitjhatjha.
Uzibetha isifuba uthi nguwe nguwe,
Kodwana siyazi bona akusingendlela le ekungiyo.

Iye khona ubonakala ungakajwayeleki,
Kodwana sihlala sikubona kuleli phasi wenza izinto ezihle ngendlela ehlukile.
Wenzelwe bona sinyuke siye kwesinye isigaba.

Kunengi okunjengawe okwenzakalako siphila kuleli phasi.
Ngitjho abesana nabakhamba nabobaba, ubusana buyafa, kuvela ubudoda.
Indoda nayithatha umfazi,
Indoda iyafa kuvela ubaba.

Minengi iminyanya lapho ubonakala ulahlwa khona, ngombana ungasanamandla namkha uphelelwe msebenzi,
Njengokuthwasa, ukuhlamba,
Ufana nobumnyama obunganamandla nakufika ukukhanya.

Kufa awusabeki ngombana nasele ufikile, kuphila okhunye,
Ufana nomnyango ovalekako bese kuvuleka omunye.
Ufana nomzila esikhamba kuwo lapho usitjhingisa endaweni yase Kanana.

Wena usibamba ngesandla usisa lapho fanele siye khona.
Nasele sifikile uyanyamalala uphelelwe mamandla.
Kufa uyinto engekho.
Ukhona ungekho.
Awusabeki ngendlela le esikusaba ngayo.