Qala bakuhlahlatha sewuphumelele basalele
Ukukuhlahlatha uhlulekile bazokuvinjwa yini?
Abant’ bahleba olele ethuneni ophilako uyini?
Abant’ bakuhleka urarhararha ufa ufe uqaliwe,
Ngokuya ngabo kuhle okumbi, okuhle kumbi;
Nawutlhagako kuhle, kumbi nawuphumelelako,
Phumelela uhletjelwe ipumelelo kunomtlhago,
Kubuhlungu khulu ukuhletjelwa ukudobha phasi.
Yamukela uzokuhlala ungileyo into abakubona
Ungiyo emandiyenabo ngitjho ungazitjhugulula
Kungakho kufanele ungazitjhugululeli ukukara
Abant’, abant’ angeze ubakare usavunguza
Mahlangothi woke ummoya womona ephasini,
Nawuzokukara abant’ bawa uZimu abakhuphe
Iinhliziy’ zomgade wentaba abafakele zezimvu,
Ungazitjhugululi utjhugulukele ukukara abantu
Abahlulwa kuzikara zibeke phambili kunabantu
Abahlulwa kutjhugulula iingqondo zab’ ngawe,
Abahlulwa kukwamukela amatjhugulukwakho,
Ithab’ alifunyanwe nguwe kokuthoma kunomunye.