Khanindibolekeni iindlebe ndithethe
Ndivumeleni kaloku ndidlale ngamagama
Ndivumeleni kaloku ndithethe inyani
Ningoyiki hayi ningothuki ayibulali nto nje iyaluma
Yohlukana nokuzibiz’uzimele geqe ngehl’uwe khiqi uqengqeleke
Khumbula kaloku sonke siyahexa
Khumbula kaloku sonke siyagungqa
Khumbula kaloku sonke siziziqhwala
Yiyolonto ndisithi uyafunek’uqabene
Yiyo lonto ndisithi uyafuneka umlenze wesithathu
Yiyo lonto ndisithi iyafuneka i Ankile
Yiyo lonto ndisithi luyafune udonga lokoyama
Yiyo lonto ndisithi uyafuneka umsimelelo
Khumbula kaloku kusemhlabeni apha
Khumbula kaloku isandla sihlamb’esinye

Khumbula kaloku neenkukhu ziyaphendlana

Khumbula kaloku neekati ziyavasana

Yiyo lonto ndisithi akekho umnt’oyedwa

Yiyo lonto ndisithi akekh’uzimele geqe

Nozimele ngenqayi elangeni wothuka sel’itshile

Ewe Ndivumeleni nditsho ndineshori

Ndivumeleni ndithi umntu ngumntu ngabantu