Baba wethu osemazulwini sibonise uthando
Sikhanyisele indlela yethu,
Hlehlisa amathunzi obumnyama ohambeni
Lwethu lakwamhlaba
Funda izinhliziyo zethu Uma ngabe imilomo
Yethu yehluleka ukuphimisa amagama,
Hlelemba zonke izihibe ezima endleleni yethu.
Sibonise uthando lwakho lweqiniso
Hawukela inhliziyo zethu,vele inyama isibuthaka
Khulula imimoya yethu kulesi sihogo sakwamhlaba
Thambisa inhliziyo zethu ezingamatshe,ezigcwele
Inzondo,amanga kanye nenkohliso,
Hlambulula izandla zethu ezigcwele igazi
Sindisa izindlebe kulesisililo esiqhuma imihla
Namalanga,
Hawukela amehlo ethu kulamanyala asewabonile
Thethelela izinhliziyo zethu ekufiseni
Ezingabelwanga khona
Buyisa ithemba kuyona yonke imiphefumulo
Esilahlekelwe ukuthemba kuwena,
Khumbuza izingqondo zethu ukuthi ukhona
Ungumalusi wethu futhi uyohlezi ukhona
Vikela abantwana bethu kulolusizi olusembethe
Kwamhlaba,
Bafihle ubumsulwa babo bengancoliswa ububi
Bomhlaba.
Khumbula izifiso zethu,
Yehlisela uthando lwakho phezu kwabantwana
Bakho ubavikele kulolusizi.
Sisindise kulezinhlungu ezisikhungathile.
Yesula lezinyembezi ezigobhozisa
Okwemifula ephakela ulwandle
Yona engashi ubusika nehlobo.
Pholisa izinhliziyo zethu ezimanxebanxeba
Butha yonke imikhonto yokuhlupheka
Uyiphose kwesakho isigodlo
Usiphe uthando singabantwana bakho
Usikhumbule njalo