Hlanza ngedela nhliziyo yam’
Ukwenzè konke nhliziyo yam’
Impela wena yen’ umthandile
Uvumile kodwa ngawe akaqiniseki
Noma ubon’ engathi uzomshiya ;
Noma ubon’ engathi uzodlala ngaye.
Inhliziyo yomuntu ayilon’ ithoyizi lokudlala
Futhi lokhu nhliziyo yam’ ukwazi kahle.
Yingakho wena kuy’ ubon’ umfazi
Kodwa ubonakal’ edidekile akakazazi,
Ukuthi ufuna uthando noma ubukhazikhazi !
Yen’ uyakhazimul’ impel’ okwenkanyezi
Umbonisile ngamazw’ ukuthi uyamthanda
Futhi unesifiso esijulile sokumshada
Amazwi kuphela awasakhulumi, awazi?
Kuwe nhliziyo yam’ izenzo ebezishoda
Nhliziyo yam’ ubusumamukele,
Naphezu kokushiyeka namaphutha.
Nhliziyo yam’, uthando seluyimali !
Nhliziyo yam’, uthando selakhiwa imali !
Wazi ukuthi imali ayilutheng’ uthando,
Ushaye phansi uthando, uthando imali.
Wena nhliziyo yam’ awunayo nanendibilishi.
Kodwa ucebile ngothando nom’ umpofu
Sal’ uxola nhliziyo yam’ yamukela!
Awuyona le nto yen’ ayifunayo,
Futhi awunakho lokh’ akufunayo.
Nhliziyo yam’ awuhlulekang’ ukumthanda,
Uyen’ ohlulek’ ukwamukel’ uthando lwakho;
Uhlulekil’ ukwamukela wen’ uqobo lwakho!
Sal’ uxola nhliziyo yam’ myek’ ahambe…
Kunzima ngiyazi kodwa mfisel’ okuhle.
Sal’ uxola nhliziyo yam’ koze kulunge,
Sal’ uxola, xol’ impela nhliziyo yam’!
Ibhalwe ngu:
Sthembiso Sydney Msezane.