Ngentseni namhlanje kweyeshumi elinesibini intsimbi nditsibe bunkawu
Ndiwutyeshel’umandlalo ndithundezwa lilindle
Kant’iingcinga ezo bezingandilalisanga kakade bezingekatyesh’engqondweni yam zona
Ndizibone ndinqika, amehlo wam ndiwaphosa esibhakabhakeni
Ebesirhwaqele ngamafu azizibhaxu ade abhijela nenyanga
Ndayibona ifuthaniselwe ngalo mafu ingenako nakuphefumla isikhanyisele
Kodwa noxa kunjalo, bekukhona ukukhanya
Ndizombathise intywenka yemibuzo
‘De ndabila ndamathontsi ndikhangel’ukuzuz’impendulo
Ekuzeni kokusa ndivuswe kukugragrama kwezinja ngokunga zix’elumhlola
Nam ndawutsib’umgubasi ebaleni ndake ndahlola
Ntonje ndiye ndee nqaku ngummangaliso
Besele lifil’ithemba lokuphefumla lalanyanga kungasekho nokuny’ukukhanya
Yanga usuku lwakutyatyekwa bubumnyama kutshabe naphakade ukukhanya
Zagabadul’iingcinga kwakhona ziphala ngesantya sikanokutsho
Kuhlwa njani na kanti sekuzakusa?
Livulek’apho ke elam’ilihlo
Ndasifuman’isityhilelo kulo mbono ulusizi kangaka wokukhothama kokukhanya kusoyiswa bubumnyama
Satyalw’isisombululo seso sishiqi engqondweni yam
Ukuba kakade kuba mnyama ngaphambi kokuba kukhanye
Intlelo zakho nazo ziyakufingana ubuv’ubomi butshabalal’emzimbeni wakho
Ulibon’ithemba lekamva ngamehlo wemfama
Ngenxa yezibhaxu zamafu amnyama azakukurhangqa arhwaqelis’ubomi bakho abenze gqwancu
Ndisifumen’isityhilelo ngalo mbono, ukuba ewe liyakufa elenyanga ilitha kum ndingenamhlanguli
Andifuthanisel’agqibe amafu azingongoma abandiqengqa ngazo abo bangayinqweneliyo intlutha kwesam’isisu
Abo bayibhityisayo ingqondo yam zingcinga ezingenasondlo
Kuba ukuba bekuya ngabo ubomi bam ngebusifa nokufa kwala nyanga
Kodwa ke ngethamsanqa kufikil’ukusa
Kuze kundincumele kuzele ukukhany’okutsha, ilanga
Langa elo imitha yalo indombathise ngobushushu emveni kokunqunquth’amazinyo yingqele
Livuselel’ithemba lokuphila kumlwelwe obesele ezenzela engenamntu wakumphipha
Ndilibonile lityabeka umhlaba nawo wonke amanzi nendalo ephantsi kwalo ngako ukukhanya
Njengembali yonyana womntu oweza nokhanyo izizwe zikwintsunguzi zobusuku
Owahlatyw’ophangwani z’igazi lakhe lazityabeka zacinyw’izenzo zethu zobugwenxa
Ndifunde nto ngalo mbono
Ukuba xa ubomi bukuphelela kweliny’inqwanqwa uQamata ukunyusela kwelinye
Xa uphulukwa ngabantu kwikhabathiso elithile lobomi bakho, uThixo ukucocela abanyaniseke ngakumbi kwelizayo
Nam ndiyilo ntyatyambo intshule ngaphandle kokukhanya
Koko umnqweno wam ngowokuba zingabisantshula ezinye ezilolo didi
Nakuwe makufike ukukhanya, uzonyule kumatyathango weli hlabathi
Ukukhanya kuza emveni kwentsunguzi
Ngenene liduduma lidlule