Nganeno nje kunobudididi,
Nezibhengubhengu zomoya,
Ohuqa ubhenguza kuwohlok’ amahlamvu,
Kutsheke amagatsha kuhhahham’ indalo,
Kuqhuphuke uthuli lukhongozele,
Lugimbi lumboze lungadeli,
Sekuqonge ubusika bosiz’ olugazula,
Umphefumulo.
Nganeno nje kwethuna,
Kugqwambik’ inhlamvu yelanga,
Kutshek’ unyezi udedel’ usizi
Nenhlamvu yelang’ ebelisifudumeza ngothando,
Kusal’ ingqondo idwanguz’ ebumnyameni,
Kusal’ inkengane ibusa ngosizi,
Nganeno nje kwethuna,
Selishonile ilanga langaneno,
Laye lathi tshobe ngale kwezintaba.