Gore o sehlogo ke go bone
Ka ditsebe ka tšea ka ge di hlokile sekhurumelo
Wa e roba pelo, o robile ya ka thobela
Ya šala e le mafofora, ke ile go thoma go topa kae
Ka mo go hlabjago mokgoši ga o batamele
Ke re wena o tsena ka mo ba ntšhitšego la mohlagare
Gore o sehlogo le gona ke go bone
Ge o kgaoganya lesea le mmago lona le sa tšo belegwa
Lešoko lona ga o nalo ke go kwele
Mokgwa ke lemogile gore ga o belege wena o tšea fela
Digotlane, ke ra tšona dikgaphamamina le monyetla wa go tseba botswadi ga o ba fe wona
Ke re o mohumi goba o mohloki
O tšofetše goba o moswa
O Mothomoso goba o mošweu
O topa fela wena ga o kgethe
O mpipetše dimpa ebile ge ke bolela ka wena ke a hlohlwa
Efela ke hlohliwa ke eng?
Ka gore wena ke a tseba gore ga o na lešoko
E re ke homole ka gore ge ke bolela ka wena go ka re ke a go gakatša
Ke ra ka gore re leka go kgalema
Fela ge e le tsebe yona ga o nayo
Go lokile, se se sa feleng se a hlola
Ke ra wena lehu, sehlola ke wena