Ingoma Yosizi
kuyoze kube nini ngimemeza?
Kuyoze kube nini ngizabalaza?
Kuyoze kube nini ngikhala ngimemeza?
Ngiyamemeza kodwa akekho osabelayo
Ngimemeze ngalo lonke izwi kodwa lutho ovelayo
Kuyoze kube nini ngihlala ngokuqudula?
Usizi olubonakala ebusweni ngokuhlale ngiswacile
Ngizacile! ngizacile! ngizacile! usizi
Ngikhalela usizo olungntweza njengokhozi
Luzongitakula kulo mkhumbi wosizi ocwilayo
Angikwazi sizi wangifunani
Angikwazi sizi wabonani kimi
Ngicela ungiyeke buyela kini
Buyela kulowo owakuthumela kimi
Ngangimenzeni aze angiqalekise kangaka
Kusho ukuthi uyajabula mangiqathana nosizi
Usizi olungizacisayo nami ngikufisile ukaba mapakapaka
Phela wena wangiqala ngimngaka
Sizi lokhu wangihaqa ngisewusana
Ngoba kumama nakubaba yimi kuphela inkosana
Amathemba bawabeke Kimi okuthi ngilenye ilanga ngiyoguqula izinto kwazise bazele Indodana
Kanti ngiyindodana yosizi!
Bayosho kanjani ukuthi ukuzala ukuzelula?
Lapho izinto kulo mhlaba zingelula
Ngikhule ngaphansi kosizi
Ngisibekelwe ifu elimnyama losizi
Izibani ngizikhayisile ze zingikhanyisele
Ukube ngangazi ngabe angizalwanga
Ngabe ngabuyela emuva kwelaba ngakaveliyo
Akusekho ukuye muva angiyilwe noma ngingenaviyo
Ngiyibambe ishisa usizi luyavikisa
Lungivikisa lungivikisile umshiza ukhale ezimbanjweni
Usizi lungaphezulu kwami luyinqwele
Ngizigobhozile zosizi ngihewulile ngibhongile
Ngoba imivimbo yalo ibuhlungu
Lugadle zephukela noma sengicela umaluju
Abanosizo bamele le kude
Babukela bekude usizi lungibhuquzisa
Kunokuba bezongisiza bangenza inhlekisa
Amandla ngemuncwa wona ngathenwa
Ngiyinkuzi eyaphucwa amandla
Angikwazi ukulwa ezami izimpondo zanqanyulwa
Yingakho usizi luzinika amandla ngami
Lolu sizi lwaqala ngesithokazi esingizalayo
Waqalekiswa ngosizi lodwa
Lezi ziqalekiso aziveli ngaphandle
Kodwa kuso kanye lesi sibaya
Ngezinhliziyo ezinobuthakathi bawugaya
Bawuklwebha bawukhwifa bawuhlikihla
Wavala zonke izibusiso nezihlanhla zakhe
Bafunga bathi : ‘ akukho okwakhe okuyokuma’
Ngingama kanjani ke ngimelane nosizi?
Lolu sizi angizibangelanga lwabangelwa
Babenomoya wempi babelwa naye
Manje usizi lunami shaqa lulwa nami
Lempi yami nosizi umshawushile
Akukho la oluya khona lunami shaqa ngiqambe ngishilo
Lokhu ngisishilo lokhu ngisikhihlile isililo
Usizi lufuna ngilukhothamele luthi luyinkosi
Lufuna ngilukhulekele luthi liwunkulunkulu
Lufuna ngiluphakamele luthi luyisikhulu
Uphi umhlengi wami…,
Azongihlenga kulolu sizi?
Uphi umtakuli wami…,
Azongitakula kulolu sizi?
Uphi ummeli wami…,
Azongimela kulolu sizi?
Uphi umlamuleli wami…,
Azongilamulela kulolu sizi?
Uphi ujele wami…,
Azongivulela ngiphume kuleli jele losizi?
Ngifisa amaphiko okundiza okundizela kude le lakungena sizi khona
Ngifisa ijubane njengensephe lokubalekela lolu sizi ngilishiye
Usizi ngapha ikati lilele eziko nangapha
Nomshaya ndawonye nawo ngapha
Zontathu lezi zinqakisana ngami
Izindlela zokulixosha ngizizamile
Kodwa alifuni ukusuka lenqabile
Amathuba emsebenzi nawo ayenqaba
Angifuna isipiliyoni engingenaso
Amathuba emfundo nawo futhi ayenqaba
Bathi angibuye emva kwezinyanga
Makunjena kwenziwa njani?
Bathi akuvelwa kanye kanye kungemadlebe embongolo
Ontanga mabephumelela uba la umhobholo
Usizi lungilayile lungigile igoda
Umhombolo awumuhle ngiyazi
Nami angizenzi ngenziwa yilo usizi
Nami ngiyafisa ukuwelela ngale kwebhuloho
Ibhuloho lwempumelelo nentokozo
Nami kengikhombe ngaphakathi bo
Dala ngiphila usizi olubuse impilo yami njengomnikazi
Ngibhekile emazulwini kuMnikazi wakho konke
Ngedolo ngiguqile usizo ngilunxusile
Nginethema lokuthi Yena uyolizwa usizi lwami anginike usizo angesule izinyembezi zosizi aze alungise itafula phambi kwalolu sizi lwami
Le ingoma yami yosizi egcwele ukubalisa nezinsizi
Amazwi ayo avela ngokuqhatha lona usizi
Nginethemba lokuthi usizi luyosuswa Kimi
Nginethemba Kimi ngaphathi
Ithemba elizomelana nosizi unomphela!
ibhalwe ngu:
S’thembiso Sydney Msezane