‘MTHOMBENI’
Thombeni, Gegana, Yangalala
Ndiyase ndlovu eyehla intaba
sinyovana ngokusabisa umboko wayo,
ngeyagadanga hlangana kwamaKhandla nama
Thombeni, amaNtungwa asaba alala ngaphasi
komuthi,
umuthi wavuka uthombile kwathiwa nguThombeni.
Thombeni! Tjhigwana! Ndiyase! Gegana! Yangalala!
Sgadanga ngoboya entabeni yema Bulembu,
Ndebele makonkwana, uphambana nekomo adle
umelusi,
sigada sandlongwana ngesagad’ emzileni
hlangana kwamaKhandla nama Thombeni,
umde umbuyelele bhambad’ amaphanga namadoda
Ndiyase kaThombeni.
Tjhigwana budlongwana ngebagega ngaphasi
kweentaba eembili, ngaphasi koWuba no Mhlopheni,
ngabalala ngaphasi komuthi umuthi wavuka
uthombile,
ndlovu esebuthwa, ngebaphepha ngotjani abanye
baphepha ngomthangala,
nakuziinkunzi yeniz’lise zibulalane,
ngabahlaba uMntungwa ngomkhonto,
uMntungwa wezwa ub’hlungu naphama iingazi,
ngebathi bagijimisa iinyamazana zathi
noma zisehla-zikhuphuka neentaba,
satjho sizkhomba siz’lakamela ngemikhonto
sithi ‘nanziyaa’
Liqina lako Thembani, elagadanga ngomlenze
munye emrhuleni kwahlangana amaKandla
namaThombeni.
Ngabakhe endleleni, bakhele abaphambukeli
indlovu eyabhula ngomboko, yabhula ngetjhoba,
Yagadanga ngeqatha kwaThombeni emasangweni
abafazi nabentwana babona ngamadoda ukuyaluzela.
Singabaphuma kwaSoMamba, kwamfazi umatjhila
njengendoda, bathi mlinganyana gijima uyotjela
uLenjana kaNzunza,
ufike uthi esinje ngesinjani?
ULenjani kaNzunza wathi buzimba buyakulanda iPofu
edakeni.
Sithe sisebuzimbeni, lavuka iqina elimavuko mabi
elajama ngomlenze munye hlangana kwaNtungwa
nama Thombeni, abaNtungwa balibona bathi
manikelela
thina amaThombeni sathi yikosi yekhethu yama
Thombeni.
EEE! Ndiyase…