Dulang le nna
Ke lebelelane le tša lefase le
Ke le sephedi sa lona lefase le.
Dulang le nna
Ke kgone go ja marapo a hlogo
Mabapi le di kgato tšeo ba di tšerego
Ka maphelo a bona
Ba lebetše bjaka bophelo
Dulang le nna
Ke kgone go kwešiša seo ba se dirago
Gobane ga ke kgolwe seo se diregago
Ga ke tsebe gore ke toro goba nnete
Efela kgato ya bona
E tloga e ntlhakanya bjoko.
Dulang le nna
Ke kgone go tšea nako ya ka
Gore le nna ke kgone go tšea kgato
Ke sa hlabe pelo ya ka ka lerumo
Ke amogele seemo, ke fole
Gomme bophelo bjaka e be bopaki
Bja go paka ka ba dipelo tša leswika
Nke leswika la ka gare ga komelelo.
Dulang le nna
Ke lle, ke ntšhe bohloko,
Gore ke tle ke kgone go phula sekaku
Gore boladu botšwe bo felele
Gobane ge ke sa dire bjalo
Pelo e ile go hloka letswalo
Gomme ka ba phiri go ba kgauswi le nna.
Dulang le nna
Ke gobetše, Ee! Ke a dumela
Le se mpotše gore monna ke nku, o llela teng.
Ga ke nyake go ya bodulabahu ke sa nkga mekgato,
Ge nkabe ke nyaka,
Nkabe ke sa lla goba gona go leka go kwešiša
Le go ntšha sa ka mafahleng a ka.
Dulang le nna
Le nkeme nokeng
Gobane maatla ga ke sa na ona
Boitshepo le bjona ba nkamogile.
Ke dutše fela ke le noši
Ga ke tsebe Pele le morago
Efela ge e le ka letlalo gona
Ke kwele!