Bheka Ilanga
Ukuphuma kwelanga ukushona kwalo
Ukushona kwelanga ukuphuma kwalo
Alishoni lingaphumanga futhi…
Aliphumi lingashonanga
Alithi liphuma bese lishona
Alithi lishona bese liphuma
Futhi laphuma lizoshona nakanjani
Lashona lizophuma nakanjani
Liyazazi ukuthi libalulekile
Liyazi ukuthi siyalidinga ukuze siphile
Lisazi kahle isikhathi sokuphuma
Lisazi kahle isikhathi sokushona
Amandla alo awapheli
Amandla alo awanamkhawulo
Kwala noma lihamba lukeke ebusika
Yeka ubuhle balo lapho liphuma!
Yeka ubuhle balo lapho lithambama!
Okungakenzeki kusazokwenzeka
Ubuhlungu bandulela ubumnandi
Ubunzima bandulela ubulula
Usizi landulela injabulo
Ubumnyama bandulela ukukhanya
Angeke uvune ungatshalile
Angeke kumile kungahlwanyeliwe
Akwenzeki ngokushesha
Akwenzeki kalula kanjalo nje
Ngesithelo somshikashika
Ngesithelo sokushikashikeka
Umvuzo umzamo
Umzamo umvuzo
Ngaphandle kokunye akwenzeki okunye
Ungapheli amandla
Ungapheli umoya
Njengelanga ubalulekile
Njengelanga unendima ebalulekile
Njengelanga kuvumele ukuphela amandla okwesikhashana
Kodwa kusasa uzovuka unamandla amasha sha
Ze ujabulele ukuphila
Ngokubheka ilanga
ibhalwe ngu :
S’thembiso Sydney Msezane