“O se ke wa tšhoga morwa. Boa,” ke ile ka kwa lentšu la gagwe le le kgojana.

“Modimo o na le maatla ka nnete,” lentšu le lekoto la realo.

Mahlo a ka a ile a bulega gomme ka bona tate le mma ba nkemeleditše. Eupša ke be ke se ka tlase ga Morula, ke be ke le bookelong ebile go na le Moruti wa rena yoo a bego a nkeme ka maotong a swere Bibele.

“O kae?” Ke ile ka botšiša..

“Se tshwenyege. Ke be ke nagana gore o ile go hwa, ngwanaka. O idibetše matšatši a mabedi ka moka. Gobaneng o dirile se? Gobaneng o lekile go ipolaya, ngwanaka? Re go hweditše ka tlase ga mohlare, thapo le maswika le tšona re di bone…” a sekhumola.

“Mo tlogeleng a khutše, Ma,” Moruti a realo. “Sengwe le sengwe se diragala ka lebaka. Modimo o na le morero for yena. Ke bontšhitšwe ditorong maabane bošego,” a homola gannyane, a ntebeletše ka phatla ya go šošobana. “Mpho mošemane wa ka, e kaba go na le molaetša wo o ratago go re fa wona?”

Ke ile ka šinyalala. Go be go se seo se kwešišegago. Na e be e le nnete goba toro fela. Sa go makatša ke gore ke be ke kgona go kwa goba gona ga Tebatšo ka moo wateng.

“Ke nagana gore ke tseba mo Tebatšo a lego gona… Kgarebjana yela ya go …”

“Hai!” tate a ntsena ganong, a pinyeletša seatla sa ka. “Ke nagana gore o swanetše go khutša, morwa. Ngaka e tla tloga e fihla go tla go o hlahloba e se kgale. Ga re nyake gore a nagane gore o lahlegetšwe ke kgopolo, akere?”

Ngaka e ile ya tsena ka moo wateng pele ke ka araba. O ile a nkamogela ka myemyelo gomme a thoma go dira mošomo wa gagwe.

“Ke nagana gore ga a na bothata. Monagano wa gagwe o šoma gabotse,” o  boditše batswadi ba ka, a myemyela. “Hei, o tloga o re tšhošitše monna Mpho.,” o tswetše pele, a tobetša setheetša modumo wa pelo dikgareng tša ka.

Ka morago ga nako ba ile ba sepela. Ka tlelwa ke boroko bjo bosesane bjalo ka lesea leo le lapilego.

Tšatšing leo le latelago batswadi ba ka le moruti ba ile ba nketela gape.

“Dumela, monna Mpho. Re bone gore re tle le batswadi ba Tebatšo gore o kgone go ba botša seo o se boletšego maabane. Ke dumela gore o ka fediša leswiswi leo le ba hlakišitšego mengwagangwaga,” Moruti a realo, a gogela setulo morago gore a dule.

Ke ile ka kwa mahwafa a ka a tshotshoma sethitho. Ke ba botše gore Ledimo ke yena a bolailego ngwana wa bona? Ge e le gore ga se a bolokwe moo ke naganago gona? Mogopolo wa ka o be o aparetšwe ke dipelaelo e le ge ke ipotšiša dipotšišo tše dintšhi. Ge e le gore – ge e le gore?

“Bona son. O se ke wa tšhoga,” mma o ile a swara seatla sa ka ka mantšu ao. “Moruti o tseba seo a se dirago. O bone tšohle ponong mantšiboa,” o ile a homola gannyane, a topa seatla sa ka gape. “Ke kgale a go rapelela go tloga mola badiši bale ba babedi ba dikgomo ba o hwetšago mola lešokeng.”

Ke ile ka bušetša mahlo a ka fase ka dihlong.

“Wena mo tshepe fela, mošemane wa ka. Ke nagana gore o nepile. O na le mpho… Bjale ka ge leina la gago le bolela,” tate a tlatšiša.

Ke ile ka ikgogela godimo moo bolaong goba go fihla ke nyakile go dula ka marago. Ke ile ka kwa go tonya gomme ka thuthumela bjalo ka ge ke be ke le ka mola rantaboleng. Na o gona mo? Ke ile ka lealea, ka holofela go bona sefahlego sa Tebatšo eupša ka se hloka.

“Ke nagana gore ke tseba mo a lego. Ke bone seo ditorong. Eupša ke maswabi ga a sa phela,” Ke ile ka thoma, ke lebeletše mahlo a Morena Lamola a go wela.

“Rena re nyaka fela go hwetša mmele wa gagwe gomme re mmoloke ka kgotso,” Mohumagadi Lamola a sekhumola, a kgapha mookgo ka seatla.

Ke ile ka ba tšhela ka tšohle tšeo ke di lorilego. Ka moka ntle ga ntwa yeo ke bilego le yona le Ledimo. Le leina la gagwe ga se ka le re pho! Ke ba boditše fela gore o bolailwe ke motho yo a lego kgauswi le yena le gore ke ka ba bontšha gore ke kae.

Matšatšing a mabedi a go latela, ke ile ka lokollwa bookelong. Moruti o ile a bitša maphodisa gomme mmogo le batswadi ba ka, batswadi ba Tebatšo le ba diforensiki, ra leba dithabeng. Ke be ke tloga ke tšhogile kudu. Ge e le gore ke fošitše? Moruti o kgonne go bala kgonono yeo e lego mahlong a ka gomme a kgonthišiša gore dilo ka moka di tla loka. O ile a re ke swanetše go dumela go maatla a ka gomme ke ba botše tšohle. Ke dirile bjalo.

Mafelelong re ile ra fihla dithabeng. Eupša ga se ka bona rantabola ge e se fela legaga leo le bego le subelela ka thabeng. Ke ile ka lealea ke nyakana le mokgekolo yola eupša ka mo hloka. Pelo ya ka ya rothotha. Rantabola yona e kae? Ka ipotšiša.

“O rile go na le rantabola mo?” Yo mongwe wa maphodisa a botšiša, mola mpša yeo a swerego goga thapo, e goba.

O ile a e tlogela gomme ya kitimela seferong se sengwe sa magaga le semeetseng.

“Ke nagana gore le mola,” ka šupa lefelo leo mpete o bego o ka ba gona, ke akanya eke re ka rantaboleng.

Ke ile ka tšwela ntle moo Moruti le batswadi ba rena ba bego ba rapela ebile ba opela difela. Ka dula godimo ga leswika, ke ipotšiša gore na mokgekolo yola o kae. Ka kwa mpša e goba ka mola gare, ka maatla gabjale.

“Re hweditše sengwe!” yo mongwe wa diforensiki o ile a goa.

Batho ka moka ba ile ba tsena ka moo legageng, ka o tee ka o tee. Ke bile wa mafelelo wa go tsena. Go be go na le marapo a motho ka lebitleng leo le sa yago fase. Ka betotša gomme ka tšwela ntle.

Mmago Tebatšo o be a lla, batho ka moka ba mo kgobokanetše. Mafelelong, maphodisa a ile a tšwela ka ntle le mokotla woo o rwelego mašaledi. Ke ile ka bogela ge ba rwele mašaledi ao gomme ba theoga ka mmila wa mabu moo sefatanaga sa bona se emego. Na e kaba ke rarolotše polao ka toro fela?

“Mpho… ka maswabi ga ke na kgetho eupša go dira se gona bjale,” Letseka la realo, le ntlema ka ditšhipi. “O swaretšwe go bolaya Tebatšo Lamola, monna. Ke fela mmolai yoo a ka tsebago moo mmele wa gagwe o lego.”

“What!” Ga se nna ke le noši yoo a ilego a goa seo. Batswadi ba ka le Moruti le bona ba ile ba ntlhatšiša ba ahlame.

“O bolaile kgarebjana ye ya Modimo gomme wa e boloka mo. Bjale letswalo la gago le a go ja gomme o khuta ka gore o bone tšohle ditorong? Please… Ga ke dumele le gatee. Na ke lona lebaka le le dirilego gore o leke o ipolaya?”

Ga gona se ke ilego ka se bolela morago ga moo seo se ntšwetšego mohola. Ke ile ka golegwa gomme ka lahlelwa kgolegong ntle le kwelobohloko.

***

Re botše: Naa o be o letetše se?