Mathabo le Peter ba be ba le lefelong la bona la mmamoratwa, thoko ga noka, ba swarane ka diatla. Hlogo ya Mathabo e be e le godimo ga magetla a gagwe, meokgo e keleketla marameng a gagwe.

Go be go fetile beke tše pedi mola ba robalago mmogo ntle le khontomo. Thero yeo mmagwe, hlogo ya sekolo le Morena Lebone ba mo filego yona e be e butše mahlo a gagwe. O ile a šoma ka boima gomme a nwa dipilisi ka mehla.

Beke tše pedi morago ga go ba le thobalano yeo e sa sireletšegago, o ile a ikwa a lwala: a hlatša ebile a dukuloga. Ebile, sa go mo makatša, o be a sa tsebe go sela lewatle le le hwibidu go tloga moo. O be a tseba gore tšeo ke dika tša boimana gomme a tšhogile.

Mathomong, o ipoditše gore e be e noba fela mmele wa gagwe o leka go itukiša morago ga mokgwa wo moswa woo a bego a o šomiša go thibela pelego, bjale ka ge mooki a boletše. Eupša o ile a thoma go tšhoga ge seo se direga gape kgweding ya go latela. Ga bjale, o be a tloga a dumela mo a ilego a ba a bitša Peter lefelong la bona gore a tle a mmotše.

“Babe, ke a tseba gore ga o na taba le ge o ka ba le ngwana gabjale. Eupša naganela mma. O tla kwa bohloko. O tloga a kgolwa gore ngwana o tla senya bokamoso bja ka …bjale ka ge nna ke dirile go yena. Nka se kgone go mmona a lla gape. Esego ka morago ga seo a fetilego go sona le tate. Le ga tee,” Mathabo o ile a realo, meokgo e benya mahlong a gagwe e le ge megopolo e thoma go boa ka hlogong.

Mehleng yeo ge tatagwe a seno sepela, go be go le boima a palelwa ke go kwešiša mmagwe, yoo a bego a swana le mphukudu. O be a fedile bjale ka mpša ya go lwala, ebile a nyakile go lahlegelwa ke kgopolo. Mmagwe o be a phela ka ngwakong, a fela pelo ge a bolela le batho, ešita le moagišane wa gagwe wa mmamoratwa, Mmalethabo. O be a le ka gare ga molete wa leswiswi wa bodutu le kgatelelo ya monagano.

Dinako ka moka ge Mathabo a be a leka go bolela le yena, mmagwe o be a no phatloga. O be a se na taba le selo – ešita le ka thuto ya morwedi wa gagwe.

Gomme seo se ile sa ama dithuto tša Mathabo, gobane a be a ikwa eke o lobile batswadi ba babedi. Se se ile sa mo šutetša kgauswi ga Peter kudu; a kgolwa gore ke yena motho a le noši yoo a bego a tloga a mo kgathalela. Go be go sa makatše ge a ile a ikwa eke lefase la gagwe le a rathagana ge a ekwa gore Peter o ikutswa le Kedibone.

Eupša e rile morago mola a feitši Kgerata ya 10, ebile a rile ga go na mohola wa gore a tšwelele ka ge ba ka se kgone go lefela dithuto tša yunibesithi, mmagwe a lemoga seo kgatelelo ya gagwe ya monagano e bego e se dira. Ebile, Mohumagatšana Boshielo, modirelaleago wa moo sekolong, a ile a tla go mmona mabapi le Mathabo. Seemo se be se boifiša.

Mmagwe o ile a napa a nyaka mošomo ka maikemišetšo, a tshepišitše Mathabo gore o tla dira tšohle go kgonthišiša gore o ya yunibesithing, ge a ka tšwelela. Lerato la mme le ile la buša bophelo le tshepo morago; o be a nyaka go bona morwedi wa gagwe a fihlelela bophelo bjo a bego a mo lorela bjona.

“Ga gona monna yo a ilego go senya bokamoso bja ngwana’ka,” o ile a ikana moragonyana go Mathabo, gomme ka fao a tsoga boka letšoba leo le bego le pona morago ga dipula tša selemo.

“Sshh! Tlogela go nagana bjale, moratiwa. Mohlomongwe e noba fela dikerempe ka mo mpeng. Go tseba mang?” Peter o ile a mo kgothatsa gabjale, a mo poraša mokokotlo. “Eupša ke nagana gore o swanetše go dira se sengwe ka se. Go no ba sure, wa tseba. Why o sa reke pregnancy test kit?”

“Eng! Batho ba tla reng ge ba bona ngwana wa go lekana le nna a reka pregnancy test kit? Gape seo se a swabiša. Le ga tee. Nna ke ka se se dire seo. Ke na le dihlong,” Mathabo a sekhumula, a šikinya hlogo.

“Go lokile, sweetheart. Ke a kwešiša. Bjo ke bothata bja rena, akere? Bobedi bja rena. Ka fao, e re nna ke ye go o rekela yona. Re tla ya rumung ya ka mola thabeneng ra yo dira diteko. O nagana bjang?” Peter o ile a realo, a le gare a poraša meriri ya Mathabo, ka myemyelo.

Mathabo o ile a dumela ka hlogo mola Peter a mo atla molomong gabonolo.

Re botše: O nagana gore Peter ke lesogana la go loka, le ge a ile a ikutswa? Gobaneng?