“Hey Mathabo. Tsoga! Ke nako ya go ya sekolong. Ke nyaka go bona Hlogo ya sekolo sa lena pele ke e ya mošomong. Ga ke nyake gore ba nagane gore ga ke go fe thekgo bjale ka motswadi. Tsoga!” mmagwe o ile a goelela, mesong ye e latelago.

Hlogo ya Mathabo e be e opa. O be a sellwa gomme a sa nyake selo ntle le go robala, eupša mmagwe a mo gogela mapai.

“Mama! Aowa!” o ile a belaela, a leka go swara mapai, ntle le katlego.

“Tlogela gore “Mama” mo. Tsoga! E sego bjale ke tla ya ka mola khitšhing gomme ge ke boa, o tla itshola ngwanenyana. Ke tla go tšhela ka meetse a go tonya.”

Mathabo o ile a dula ka marago malaong gomme a edimola.

“Sies! O nkga le bjala. O ngwana wa mohuta mang, mara wena?” mmagwe o ile a tšwela pele, a ikhupeditše dinko. O be a sa kwa morwedi wa gagwe ge a boa maabane bošego, ka lebaka la boroko bjo bogolo bja mokgathalo.

Mathabo o ile a tsheratshera a etšwa ka phapošing gomme a leba ka phapošing ya go hlapela, a hlokomologile dithogako tša mmagwe. Ka mabaka ao a tsebjago ke yena, o be a ekwa eke mmagwe o na le seabe go se: go nwa ga gagwe. Ge a be a sa tlogela mosadi yo mongwe a utswa tatagwe, ba be ba tla be ba sa dula mmogo bjale ka lelapa, a ikgotsofatša, a le gare a buletše meetse.

O be a nagana gore o tla ikwa bokaone morago ga go hlapa, eupša aowa, o ile a ikwa a le kudu. E be eke go na le leswika le lekoto la go fiša mme le mo eme mogolong. O lekile go nwa meetse eupša gwa no swana.

“Tlogela go ntshenyetša nako! A re sepele! Setlaela se sa ngwanenyana! O nwa bjang bjala mola o tseba seo bo dirilego tatago? Bo mo fetotše letlakala fela la monna. O mmone, mos. O be o šetše o le yo mogolo go kwešiša tšohle,” mmagwe o ile a hlaba lešata, a betha lebati la phapoši ya go hlapela ka letsogo. “Etšwa! A re sepele!”

Ba ile ba fihla sekolong gomme pelo ya Mathabo ya kiba ka maatla ge Hlogo ya sekolo e ba bitša gore ba tsene, a ba dumediša yaba o tsena ditabeng. “MmaMelato, ke le biditše mo ka baka la mekgwa ya morwedi yo wa lena.”

“Ngwana yo. O dirile eng bjale?” sefahlego sa mmagwe se be se benya maswabi.

“Ka labohlano o be a tletše mereba ebile o nyakile go lwa le morutiši wa gagwe, a fetša ka go tšhaba sekolong. E reng ke bitše Morena Lebone gore a tle a hlaloše,” o ile a realo, a le gare a kgotla dinomoro.

Mohumagadi Melato o ile a thoma go sekhumola, a goga Mathabo ka tsebe. “Ke eng o nyatša mathitšhere, wena? O nyaka go feila gape? Setlaela se sa lešilo! Ga ke kgolwe gore o mpoditše maaka wa tseba. O bitša tšona tše ‘dilo tša go se tshwenye’? Ga o tsebe gore ba ka o raka?” Mmagwe ga se a kgaotša mola Hlogo ya sekolo e le gare e bolela ka mogala. “O ka dira bjang se mola o bona tshokolo ya ka? Ke be ke nagana gore o tla fetša sekolo wa nthuša go tšwa ka mo bophelong bjo tatago a nthloletšego bjona. Eupša aowa, šefa o itshenyetša bokamoso. Gobaneng Mathabo? Mpotše gore gobaneng!” o ile a lla, a iphumula meokgo.

Ka pela gwa kokotwa lebating gomme Morena Lebone a tsena. O ile a kgonthišiša seo Hlogo ya sekolo a se boletšego, gomme bobedi MmaMelato le Hlogo ya sekolo ba gapeletša Mathabo go kgopela tshwarelo. Ge a bona bohloko le go swaba ka mahlong a mmagwe, Mathabo a itshola – le ge Morena Lebone a mo rogile ka phapošing ka ditaba tša ka gabo.

O ile a tshepiša gore o tla buša a ela hloko mošomong wa sekolo. O be a kgona go bona lerato leo le bego le le ka mahlong a mmagwe, gomme a lemoga gore o be a mo nyakela fela tše botše. O be a ka se tšwele pele ka go mo kweša bohloko bjale bjalo.

Go tloga gabjale, ke ile go lebelelana le mošomo wa ka wa sekolo. Ke a tseba gore nka dira bokaone le go feta, Peter a le gare a le gona bophelong bja ka, o ile a ikana ka setu.

Peter. Leina leo le ile la mo gopotša se sengwe. Letšhogo la betha pelo ya gagwe le semetsing. Ge e le gore o imile? Mmagwe o tla kgona go mo swarela phošo ye nngwe ye kgolo gape, o ile a ipotšiša, a thuthumela.

Re botše gore o nagana eng: Na e kaba Mathabo o dira gabotse ka go sola mmagwe ge a ile a ‘tlogela tatagwe a sepela’, le go nwa bjala ga gagwe bjale? Gobaneng tatagwe a sepetse?